DA, GO Negosyo, LBP naghiusa sa pagpalambo sa agrikultura sa Pilipinas
DAKBAYAN SA BUTUAN -- Arun mapadayon ug mulambo ang mga lokal nga agribusiness panahon sa pandemya, gipirmahan ni Agriculture Secretary William Dar ang memorandum of agreement (MOA) inubanan sa Go Negosyo ug LandBank of the Philippines (LBP) nga adunay tumong nga matabangan bahin sa pinansyal ang mga agripreneurs, mag-uuma ug mangingisda, nga gipangmentoran ilawom sa Kapatid Agri Mentor Me Program (KAMMP).
Nahitabo ang pagpinirmahay sa MOA pinaagi sa virtual ceremony niadtong miaging adlaw diin ang tulo ka institusyon nikomitar sa paghatag og padayon nga suporta ug paghanyag og mga inobasyon alang sa mga micro, small and medium enterprises (MSMEs) ug arun ma-improbar ang mga kinabuhi sa mga Pilipino taliwala sa COVID-19.
Ang maong inisyatibo nagtinguha nga makahatag kini og financial
accessibility sa mga agripreneurs, ug makapokus kini sa tulo ka M nga prinsipyo
sa Go Negosyo nga mao ang Money, Market, ug Mentor.
Gibutyag ni Secretary Dar, usa ka KAMMP mentor, nga magpadayon ang Department of Agriculture sa pagpangita og mas maayo nga mga pamaagi ug proyekto, ug inobasyon nga mahimong agripreneurs ang mga gaprodyus og mga pagkaon. Dugang pa niya nga kinahanglan nga mas mudaghan pa ang mga MSMEs sa sektor sa agrikultura hilabi na sa panahon sa pandemya. (DA-Caraga/PIA-Caraga)
