Groundbreaking sa Regional Evacuation Center sa RTR, gihimo
DAKBAYAN SA BUTUAN – Gipahigayon niadtong Oktubre 20, ang groundbreaking sa kapin Php34 million nga Regional Evacuation Center nga ipahimutang sa P-10, Brgy. Balang-balang sa lungsod sa RTR, Agusan del Norte.
Mismo si Kongw. Angel Amante-Matba ug Mayor Richard Daquipil uban sa mga nagkalain-laing opisyales sa lungsod ug kasikbit nga mga barangay ang nanguna sa maong kalihukan.
Usa ang lungsod sa RTR ang pipila ka natagaan sa maong proyekto sa tibuok Agusan del Norte ingon man sa rehiyon sa Caraga isip temporaryong silonganan sa mga residente panahon sa kalamidad. Base sa datus, nailhan nga dali ra bahaon ang kadaghanan sa mga barangay sa maong lungsod tungod sa low-lying o flood prone areas ang kasagaran niini.
Ang maong proyekto bunga sa pagpaningkamot ug suporta ni Kongw. Angel Amante-Matba, Gob. Dale B. Corvera ug Mayor Richard Daquipil sa RTR nga maoy naghago paghangyo niini gikan sa nasudnong ahensya hinungdan ngano nga nagahinan kini og pundo gikan sa Department of Public Works and Highways (DPWH).
Sumala pa ni SB Member Bernadette Daquipil, usa sa prayoridad ni Mayor Daquipil nga ma sulbad ang dali nga pagbaha sa RTR panahon nga adunay kalamidad. Niini, naghimo ang LGU-RTR og comprehensive flood control program aron masulbad ang maong dugay ng problema.
Ang maong proyekto sugdan dayon og konstrak karong Oktubre 21, ug gi bana-bana nga mahuman sulod sa 330 ka adlaw. Apan hangyo ni Kongw. Amante-Matba nga mapadali pa ang konstruksyon aron dali na kini magamit sa katawhan. (Karen Kie Decamotan, LGU Agusan del Norte/PIA Agusan del Norte)
