DAKBAYAN SA TANDAG, Surigao del Sur -- Unom (6) ka vaccination sites ang giandam sa lokal nga panggamhanan sa syudad sa Tandag ubos sa pakig-alayon sa Department of Health (DOH) sa gikatakdang tulo ka adlaw nga pagpahigayon sa “Bayanihan, Bakunahan” nga nagsugod sa adlaw’ng Lunes, Nobyembre 29.
Mismong si Tandag City Mayor Roxanne Pimentel ang miatender sa gipahigayon nga simpleng seremonya sa pagbukas sa unang adlaw nga gipahigayon didto sa City Gymnasium sa maong syudad. Hugot ang panawagan sa maong opisyal sa mga residente sakop sa maong syudad nga magpakabana pinaagi sa pagpabakuna.
Sa gipagawas nga Advisory No. 107 sa lokal nga panggamhanan sa syudad sa Tandag pinaagi sa opisyal nga account sa social media page, nagpahibalo kini sa publiko sa mga lugar diin ipahigayon ang pagbakuna batok sa COVID-19.
Sumala pa, ang tulo ka adlaw nga aktibidad ipahigayon sa mga musunod nga mga lugar:
- Barangay San Agustin Sur Covered Court;
- Tandag Gymnasium;
- Adela Serra Ty Memorial Medical Center (ASTMMC);
- Barangay Mabua Covered Court;
- Barangay Salvacion Covered Court, og;
- Barangay San Isidro Covered Court
Nakalista na usab ang mga target barangays sa matag vaccination sites. Ang pagpahigayon sa maong aktibidad gikatatakda hangtud sa Disyembre 1, 2021. (PIA-Surigao del Sur)
