DAKBAYAN SA BUTUAN -- Gilusad sa syudad sa Cabadbaran, Agusan del Norte adtung Lunes, Nobyembre 22, ang pagpadangat og usa ka libo (P1,000) nga incentive sa mga “Taong may K” o mga Person with Disability [PWD] ug sa mga senior citizens sa pagpanguna ni Provincial Governor Dale B. Corvera.
Ang “Pahalipay sa Taong may K” ug “Pa Good Vibes ni Lolo ug Lola” kabahin sa mapinanggaong pag-amoma nga gipadangat sa probinsya ubos sa “Amomang Agusanon” sa AGUSAN UP!, ang kampanya sa pagpalambo sa administrasyon ni Gob. Corvera kaabag ang buhatan ni Kong. Angel Amante-Matba.
Mokabat sa Php40 milyones ang gigahin sa probinsya alang ning maong benepisyo nga gimando ubos sa Provincial Ordinance No. 584-2021ug gipadangat pinaagi sa buhatan sa Provincial Social Welfare and Development Office (PSWDO).
Sa iyang mensahe, gipasabot ni Gob. Corvera nga ang mga PWDs ug senior citizens usa sa mga sektor sa katilingban nga angayang hatagan og pagtagad ug pag-amoma sa probinsya.
“Dili lang kwarta sa probinsya para ninyo kondili ang gugma ug pag amoma gikan sa probinsya ang gihatag alang kaninyong mga Taong May “K” ug sa atong mga senior citizens,” sumala sa gobernador.
Sa kinatibuk-an mosuma sa 1,231 ka PWD ug 6,648 ka senior citizens ang makadawat sa cash incentives gikan sa 31 ka barangay sa syudad sa Cabadbaran nga gipadangat adtung Nobyembre 22-23.
Magpadayon ang pagpadangat sa maong benepisyo sa ubang mga munisipyo sa mosunod nga mga adlaw.
Mitambong sa maong launching sila Board Member Elizabeth Calo, City Vice Mayor Rey Jamboy, Silver Joy Tejano sa PSWD ug mga City Officials. (Shena Mae Pabia ug Sonny Montilla, LGU-Agusan del Norte/PIA-Agusan del Norte)
