SSF sa pagproseso sa bugas ubos sa Beyond Rice ug Negosyo Center sa RTR gibuksan
DAKBAYAN SA BUTUAN -- Gi-turn over sa probinsyal nga buhatan sa Department of Trade and Industry (DTI) ngadto sa local government unit (LGU) sa RTR kaniadtong Miyrekules, Nobyember 10, 2021, ang Shared Service Facilities (SSF) nga gamiton sa pagproseso sa “Beyond Rice," o ang pagproseso og mga kakanin ug uban pang samang produkto gamit ang bugas.
Ang “Beyond Rice” mao ang gipahiluna sa probinysa sa Agusan del Norte nga Core Processing Project sa lungsod ubos sa AGUSAN UP!, ang kampanya sa pagpalambo sa administrasyon ni Gob. Dale Corvera kaabag ang buhatan ni Kong. Angel Amante-Matba.
Dungan niini giablihan usab sa DTI sa publiko ang Negosyo Center sa lungsod nga magsilbing sentro sa mga serbisyo sa pagpahiluna og mga ekonomikanhong kalihukan sa lugar.
Niini, nagpadayag og pasalamat si RTR Mayor Richard Daquipil sa DTI ug kang Gob. Corvera nga nagpasiugda sa proyektong "Beyond Rice" ug ubang serbisyo pagpalambo sa nga negosyo pinaagi sa AGUSAN UP.
Sumala ni Mayor Daquipil nga daku ang mahimong tabang sa maong mga himan sa mga processors sa kakanin ubos sa maong programa ning maong lungsod nga nagsilbing “rice granary” sa Agusan del Norte.
Nagpadayag usab og kalipay si Gov. Corvera tungod kay nakita niya nga lamdag na nga makab-ot sa probinsya sa Agusan del Norte ang panglantaw niini nga mahimong agri-processing center sa Caraga, magmalambuon ang mga negosyo ug moangat ang kita sa mga tawo.
“Daku kaayo ko og pagtuo nga kung ato ning suportahan atong mga MSMEs, molambo ang ekonomiya sa atong probinsya tungod kay mag unsa ang usa ka lugar kung walay mga negosyo. Ang negosyo ang makabuhi sa ekonomiya,” matud sa gobernador.
Sa bahin sa DTI, gipadayag ni Provincial Director Brenda Corvera nga ang pagpadangat sa maong SSF ug ang pag-abli sa Negosyo Center bunga sa kolaborasyon tali sa probinsya kansang kampanya sa pagpalambo nga mao ang AGUSAN UP! gisuportahan sa iyang buhatan.
Ang pag-abli sa Negosyo Center, dugang sa DTI director, magsilbing ilhanan usab sa tuyo sa DTI nga makapahiluna pa gyod og dugang negosyo ug mapalambo ang ekonomiya sa lungsod. (Karen Kei V. Decamotan ug Sonny Montilla, LGU-Agusan del Norte/PIA-Agusan del Norte)
