SSF sa food processing gipadangat sa DTI sa LGU Carmen ug kooperatiba sa Buenavista isip suporta sa Agusan Up
DAKBAYAN SA BUTUAN -- Gilusad sa Department of Trade and Industry (DTI)- Agusan del Norte kaniadtong Martes, Nobyembre 9, 2021 ang Shared Service Facilities (SSF) sa food processing ug Norwegian fish cages ngadto sa local government unit (LGU) sa Carmen isip tubag sa panginahanglan sa lungsod ug isip suporta sa Process! Process! Process! Project sa AGUSAN UP!, ang kampanya sa pagpalambo sa administrasyon ni Gob. Dale B. Corvera kaabag ang buhatan ni Kongw. Angel Amante-Matba.
Gi-turn over usab ang laing set sa Norwegian fish cages ngadto sa Caraga Aqua Culture Producers Cooperative sa Buenavista sa maong okasyon diin nagpirmahay ang mga cooperators – DTI, LGU-Carmen ug kooperatiba – sa Memorandum of Agreement (MOA) ug Usufruct Agreement. Mipirma usab si Gob. Corvera sa maong mga kasabutan isip witness.
Mismo ang gobernador ug si DTI Agusan del Norte Provincial Director Brenda Baybay-Corvera sa DTI ang nag-abli sa pasilidades sa food processing sa nahimutangan niini sa merkado sa Carmen nga nagsilbing kabahin sa mga kalihukan sa pagsaulog sa probinsya sa ikaduhang tuig sa AGUSAN UP! Development Campaign.
Mi-komiter usab si Technical Education and Skills Development Authority (TESDA) Provincial Director Rey Cueva sa maong okasyon nga andam mohatag og training ang TESDA para magamit gyod og ensakto ang mga pasilidades.
Sa iyang mensahe, gipadayag ni Gob. Corvera ang iyang kalipay tungod sa pagtinabangay sa lokal ug nasyonal nga ahensya ingon man sa mga negosyante ug mag-uuma tungod sa ilang hugtanong suporta sa kampanya sa AGUSAN UP! alang sa ekonomikanhong paglambo sa probinsya.
Gawas kang Mayor Jovitte Calo sa Buenavista ug mga sakop sa kooperatiba sa maong munisipiyo nga maoy mipirma sa MOA, mitambong usab sa maong kalihukan si Vice Mayor Ramon Calo ug ubang mga opisyales sa Carmen ingon man si Provincial Administrator Gerry Joey Laurito. (Karen Kei V. Decamotan ug Sonny Montilla, LGU-Agusan del Norte/PIA-Agusan del Norte)
