POPCOM, LGUs mutonol og hinabang binulan sa mga batan-ong inahan
BUENAVISTA, Agusan del Norte -- Ang mga batan-ong inahan ug ang ilang mga anak kansa gikan sa siyudad sa Butuan ug Cabadbaran, Agusan del Norte, makadawat og tabang pinansyal gikan sa gobyerno. Ang maong pinansyal na tabang ihatag pinaagi sa pagpatuman sa Social Protection Program for Adolescent Mothers and their Children (SPPAMC).
Ang Commission on Population and Development, Department of Social Welfare and Development, ug ang LGU Butuan ug Cabadbaran maghatag og 500 pesos nga binulan na pinansyal na tabang sa mga napili nga batan-ong inahan nga naila pinaagi sa pagprofile ug pagtahas na aktibidadies sa giingon na mga LGU isip suporta sa personal nga kalamboan ug mga tumong sa mga batan-ong inahan. Ang binulan nga hinabang itunol human sila ug ang ilang mga anak makabisita sa health center ug makatambong sa kalihokan sa SPPAMC.
Kini nasayran human ang POPCOM Caraga nagpahigayon ug tulo ka adlaw na Program Design Workshop on SPPAMC alang sa mga pilot LGUs nga mag implementar sa mapuslanon nga laraw bag-ohay pa lang.
Ang POPCOM Caraga ug ang siyudad sa Butuan ug Cabadbaran nakaila sa importante nga papel sa mga kabatan-onan sa lokal nga kalamboan samtang nagkomit sa promosyon sa kaayohan ug holistic growth isip prioridad sa mga kalamboan na plano. (Dian Joy L. Martinez, POPCOM Caraga/PIA Agusan del Norte)
