Wednesday, May 25, 2022

Pagbansay sa packaging ug labeling alang sa mga kakanin makers sa RTR, ipahigayon sa Agusan del Norte 

DAKBAYAN SA BUTUAN -- Himoon karong Mayo 27 ang Packaging and Labelling Training alang sa mga kakanin makers sa lungsod sa RTR isip suporta sa probinsya sa Agusan del Norte pagpalambo sa ilang produkto ubos sa “Beyond Rice” o ang pagproseso sa bugas ngadto sa nagkalain-laing produkto alang sa dugang kita o value added income. 

Ang “Beyond Rice” mao ang core processing project sa lungsod sa RTR ubos sa Process! Process! Process! Project sa AGUSAN UP, ang kampanya sa pagpalambo sa administrasyon ni Gob. Dale B. Corvera kaabag ang buhatan ni Kong. Angel Amante-Matba.

Sa panagtigum sa kakanin makers sa lungsod niadtong  Byernes nakapili sila og 10 ka membro sa nasangpit nga asosasyon nga mo-apil sa pagbansay.

Ang pagbansay magsilbing pagpangandam usab sa mga kakanin makers sa pagpamaligya nila sa ilang mga produkto sa trade fair and exhibit nga ipahigayon sa probinsya sa Robinson’s Place Butuan isip kabahin sa mga kalihukan sa kasaulogan niini sa 55th Araw ng Agusan del Norte.

Gipili usab sa atol sa maong tigum sa kakanin makers sa RTR niadtong Mayo 20 ang mga bag-ong opisyales sa ilang asosasyon. (LGU Agusan del Norte/PIA Agusan del Norte)