Abonong Swak Tubag sa Pagmahal sa Abono
DAKBAYAN SA BUTUAN -- Sa tinguha nga matabangan ang mga mag-uuma sa humay luyo sa pagmahal sa presyo sa abono, subsob karon ang kampanya sa Department of Agriculture sa teknolohiya nga gitawag ug Abonong Swak! Swak sa Budget! Swak sa Humay!.
Kagahapong adlawa, midangat si Dr. Rodolfo Estigoy, Senior Technical Adviser for Strategic Communications sa DA-Central Office sa Dakbayan sa Butuan ug nakigtigum sa mga sakop sa Regional Technical Working Group alang sa Abonong Swak.
Sa maong tigum, gidayeg ni Dr. Estigoy ang OneDA Caraga Family gumikan sa mga inisyatibo nga gihimo aron mapromotar ang Abonong Swak sa lain-laing paagi.
Gitaho ni Emmylou Tereso Presilda, hepe sa Regional Agriculture and Fisheries Information Section o RAFIS nga gikampanya sa DA-Caraga ang maong teknolohiya pinaagi sa pagsibya, pagprinta ug mga basahon, ug pinaagi sa social media, ug uban pang nakahan-ay nga aktibidad uban sa presenya sa mga mag-uuma.
Samtang ang ubang membro sa OneDA Family sama sa DA-ATI, DA-PhilRice ug DA-BSWM mipaambit usab nga ilang gipahibawo ang maong teknolohiya nunot sa ilang tagsa-tagsa ka mga kalihukan sa buhatan.
Ang Abonong Swak, usa ka kampanya nga gibasi sa Balance Fertilization Strategy (BFS) diin gihatagan ug kahigayunan ang mga mag-uuma sa pagpili sa lain-laing kombinasyon o gitawag ug combo sigun sa budget ug gitinguha nga ani pinaagi sa paggamit ug inorganic ug organic nga abono.
Tuyo niini nga mamenusan ang galastuhan sa pagpalit ug kemikal nga abono apan mahatag gihapon ang gikinahanglang sustansya sa humay pinaagi sa kombinasyon sa organic ug inorganic nga abono.
Gitataw ni Dr. Estigoy nga dili rason ang kamahal sa abono nga dili na ihatag sa tanum ang iyang gikinahanglan sanglit adunay pamaagi nga makatabang sa mga mag-uuma nga makab-ot gihapon ang gidahum nga abot sa pagtikad sa kahumayan pinaagi sa pag-adaptar sa Abonong Swak!
Nunot niini, ang DA-Caraga pinaagi sa Rice Program magpahigayon ug technology demonstration o techno demo sa lima ka probinsya sa rehiyon aron makita sa mga mag-uuma ang bentaha sa pag-adaptar sa Balance Fertilization Strategy. (DA Caraga/PIA Caraga)
