Fuel Subsidy Alang sa mga Mag-uuma sa Mais ug Mangingisda sa Caraga Region, Gisugdan Na
DAKBAYAN SA BUTUAN -- Magkatambayayong nga gilusad sa Departmemt of Agriculture (DA) Caraga ug Bureau of Fisheries and Aquatic Resources (BFAR) karong adlawa ang Fuel Discount Card Program alang sa mga mag-uuma sa mais ug mangingisda nga gipahigayon sa rehiyunal nga buhatan sa DA ning dakbayan sa Butuan.
Mokabat 351 nga mga mag-uuma sa mais ug mangingisda ang nakadawat sa ilang Fuel Discount Card karong adlawa nga gikan sa dakbayan sa Butuan, Buenavista, Nasipit, ug Carmen, Lalawigan sa Agusan del Norte.
Ang fuel subsidy usa ka tabang alang sa mga mag-uuma ug mangingisda sa rehiyon nga nanag-iya o nag-operate ug mga makinarya sa pagpanguma o pagpangisda taliwala sa pagsaka sa presyo sa krudo tungod sa pandemya ug bangi sa Ukraine ug Russia.
Ang partner nga institusyon, ang Universal Storefront Services Corporation o USSC, maoy miisyu sa fuel discount payment cards nga adunay sulod nga tulo ka libo ka pesos. Ang maong discount cards mahimo lang nga gamiton sa pagpalit ug krudo o gasolina sa aprubado ug akreditado nga partner fuel station.
Ang seremonya sa pagtunol sa mga card gipangunahan nila ni DA-Caraga Regional Executive Director Engr. Ricardo M. OΓ±ate, Jr., BFAR-Caraga Regional Director Dr. Nilo Selim Kadata, Sectoral Chairperson for Rice and Corn Antonio Cabrera sa Regional Agricultural and Fishery Council, Area Manager Vernie Cugay sa USSC Eastern Mindanao, Field Operations Division Chief Melody Guimary sa DA-Caraga, and uban pang dinapit nga bisita.
Mapasalamaton si Director OΓ±ate, Jr. sa mga mag-uuma ug mangingisda nga bisan sa mga pagsuway padayon gihapon sa pagpaningkamot aron makabaton ug pagkaon ang katawhan.
Nasayran gikan kang Melody Guimary, nga mokabat 1,616 ka mga mag-uuma sa mais ang target nga benipisyaryo, samtang ang BFAR nagtarget usab ug 2,186 ka mga mangingisda aron mahimong benipisyaryo sa programa sa tibuok rehiyon.
Ang pag-apod-apod sa subsidy card magpadayon ugmang adlawa Hunyo 22 sa Las Nieves, Agusan del Norte ug sundan sa Talacogon alang sa mga benipisyaryo sa maong lungsod ug lakip na gikan sa sikbit nga munisipyo ang Lapaz, ug San Luis sa Agusan del Sur karong Hunyo 23, ning tuig kasamtangan. (DA-Caraga/PIA-Caraga)
