5.7M Kantidad sa mga Makinarya sa Pagpanguma Giturn-over sa DA-Caraga sa Grupo sa mga Mag-uuma
DAKBAYAN SA BUTUAN -- Mokabat upat ka makinarya pang-umahan nga nagkantidad og sobra P5.7M ang gi-turn over sa Department of Agriculture (DA) Caraga ngadto sa grupo sa mga mag-uuma sa mais ug balanghoy dinhi sa rehiyon sa Caraga niadtong milabay’nga semana.
Kini atol sa pagbisita ni National Corn Program Director Milo Delos Reyes.
Unang midawat sa usa ka unit nga hauling truck ang Mapulian Farmers Association sa Hawilian, Ezperanza, Agusan del Sur niadtong Hunyo 27 niing tuiga. Dayun sunod nga midawat og usa ka Combine Harvester, Corn Planter, ug Pump and Engine Set ang Bangsod, Anahaw, Bag-o, Kinabigtasan Farmers Association o (BAKIFA) sa Kinabigtasan, Tago, Surigao del Sur niadtong Hunyo 28.
Sumala ni Director Delos Reyes, ang maong interbensyon maoy sanong sa DA aron nga mahatagan og kasulbaran ang mga hagit nga giatubang sa industriya sa mais ug cassava dinhi sa rehiyon ug sa tibuok nasud sa pilipinas.
Gidasig sa maong director ang mga asosayon nga padayung muuswag ug dili mohunong sa pagpananom.
Kalabot niini dakong kalipay sa mga benipisyaryo nga midawat sa mga makinarya ug ekipo.
Usa na niini ang chairperson sa BAKIFA nga si Richard Virtudazo. Sumala niya, kaniadto damgo lamang nila kini nga mga makinarya, pero karon nadawat na gayud nila. Makatabang matud pa ang ilang nadawat nga mga makinarya nga makadaginot sa galastuhan sa pagpanguma.
Gipaniguro usab ni Field Operations Division Chief ug Regional Corn Program Coordinator Melody Guimary nga padayung mutabang ang DA alang sa pag uswag sa produksiyon sa kaumahan pinaagi sa mekanisasyon.
Samtang gi-awhag ni Regional Technical Director for Operations Rebecca R. Atega nga ampingan ang bag-o nga mga makinarya aron mas taas nga panahon nga makatabang sa mga mag-uuma.
Gibisita usab ni Director Delos Reyes ang pipila ka proyekto sa grupo sa mga mag-uuma sa mais, balanghoy ug soybeans sa Esperanza Agusan del Sur, Las Nieves, Agusan del Norte ug sa Tago ug San Agustin sa Surigao del Surug nakigdayalogo sa mga membro ug opisyales niini.
Ang serye sa turn-over nga kalihokan maoy parte sa farm mechanization program sa DA sa tumong nga mas mapasayon ang trabaho, mas paspas ug makunhoran ang usik o postharvest losses. (DA Caraga/PIA Caraga)
