Direksyon sa Probinsya sa Agusan del Norte, gilatid ni Gob. Amante sa ELA
DAKBAYAN SA BUTUAN -- Gilatid ni Provincial Governor Ma. Angelica Rosedell M. Amante ang kinatibuk-ang direksyon sa probinsya sa Agusan del Norte ubos sa iyang administrasyon sulod sa tulo ka tuig diin sentro sa ekonomikanhong kalihukan ang mahimong prayoridad karon subay sa programang AGUSAN UP, ang kampanya sa pagpalambo nga gisugdan ni kanhing gobernador Dale B. Corvera nga Kongresista na karon.
Sumala pa ni Gob. Amante, buot niya ipadayon ug ipalambo pa ang nasugdan nga maayong programa ni Kong. Corvera tungod nakita niya nga daghan maayong nabuhat ang kanhing gobernador bisan pa talewala nga gisagubang nga pandemya panahon sa iyang termino.
Buot sa gobernador nga tutukan karon sa probinsya ug tahas sa matag opisina sa kapitolyo ang mga mosunod: 1) maka-generate og dugang nga local income aron dili lang mag-depende sa tinuig nga income gikan sa nasyonal; 2) Pagpalig-on sa mga empleyado nga mahimong mas epektibo ug episyente sa pagpaabot sa serbisyo sa katawhan; 3) pagpalapad sa serbisyong medikal o health services lakip na ang pagpatuman sa “No Balance Billing” ug pag-level up sa serbisyo sa Cabadbaran City District Hospital isip kaabag sa Provincial Hospital; 4) sa social services, ipalambo pa ang mga pamaagi sa paghatag og serbisyo sa katawhan ug ang 5) matabangan ang mag-uuma nga makabarug sa ilang kaugalingon pinaagi sa pagtudlo kanila sa pag-proseso og produkto gikan sa ilang abot sa uma subay na usab sa Plant3x ug Process3x sa Agusan Up.
Sa bahin sa edukasyon, prayoridad na usab karon ang paghatag og scholarship ngadto sa mga estudyante nga nagkuha og kurso kalabot sa agriculture ug health. Alang ni Gob. Amante nga ma-secure ang kaugmaon sa mga scholars sa probinsya tungod mao ang nakita nga panginahanglanon karon.
Level-up usab ang serbisyo sa pagpangandam sa moabot nga disaster nga
bahin diin buot sa gobernador nga maka-debelop og usa ka aplikasyon nga makita
dayon ang “real-time” nga panghitabo sa pagbaha sa kasikbit nga lugar sa
probinsya aron makabuhat dayon og aksyon ang probinsyal nga panggamhanan
kalabot niini.
Gawas niini, tutukan usab sa probinsya nga ipalambo ang turismo nga bahin ug matamnan og mangroves ang mga potensyal nga lugar nga mahimong posibleng tourism sites.
Pasabot ni Gob. Amante, kinahanglan nagkahiusa ug nakalink-in ang matag opisina ug mamahimo makig-tambayayong usab ang probinsya sa laing ahensya sa goberno aron makab-ot ang panglantaw sa probinsya nga mahimong First Class Province ug Agro-Processing Center sa Caraga Region pag-abot sa tuig 2027.
Pinaagi niini nga mga programa gipunting nga makab-ot ang panglantaw sa kalambuan sa probinsya, makunhoran ang gidaghanon sa mga pobreng pamilya, mapaangat ang kalidad ug maabot sa katilingbanong serbisyo, mapahimsog ang kinaiyahan ug matagamtam sa mga Agusanon ang haruhay nga kahimtang sa pagpuyo. (KKD, LGU Agusan del Norte/PIA Agusan del Norte)
