Unang adlaw sa F2F classes, gibuksan na, tulunghaan sa probinsya sa AgNor, plastado
DAKBAYAN SA BUTUAN -- Plastado ang pag-implementar sa mga sumbanan sa tagsa-tagsa ka tulunghaan sa probinsya sa Agusan del Norte atol sa unang adlaw’ng pag-abli sa limited face-to-face classes nga mga tulunghaan sa probinsya karong adlawa, Agosto 22.
Kini ang gipadayag ni Rosell Abella, ang Division Coordinator sa
Department of Education (DepEd) Agusan del Norte.
Sumala pa ni Abella, gipangandaman gyud sa mga personahe sa DepEd ang
pag-abli sa klasi aron mahimong han-ay ug plastado ang pag implementar sa mga
sumbanan gikan sa mga class program, classrooms ug pag-implementar sa Water,
Sanitation and Hygiene in Schools (WinS) Program sa maong ahensya.
Matud pa niya, striktong gi-implementar ang mga basic protocols sama sa
paghugas og kamot gikan sa pagsulod hangtud sa pag-gawas sa maong eskwelahan.
Kung panahon usab sa recess, aduna’y tagsa-tagsa nga dala nga snacks ang mga
estudyante aron malikayan ang covid-19.
Dili usab kinahanglan nga bakunado ang mga estudyante apan padayon
gina-awhag ang mga ginikanan nga pabakunahan ang ilang mga anak aron sa
kaugalingong proteksyon.
Nagmalinawon usab ang dagan ug wala’y nataho nga bisan unsang insidente
atol sa unang adlaw, dugang ni Abella.
Base usab sa taho sa mga magtutudlo, kalipay ug excited ang nabati sa
mga estudyante tungod sa dugay na panahon nga nag virtual classes lamang kini
tungod sa pandemya.
Mapasalamaton ang mga personahe sa DepEd sa walay puas nga suporta ug
dakong pagtagad mahitungod sa edukasyon nga gipadangat nila Gov. Ma. Angelica
Rosedell M. Amante ug Kong. Dale B. Corvera sa mga panginahanglanon
niini.
Usa ang Caasinan Elementary School sa Brgy. Caasinan sa dakbayan sa Cabadbaran ang nag-abli sa klasi kagaina diin gidagsa kini sa mga estudyante ang maong tulunghaan. (GoEustella Monette/KKD, LGU Agusan del Norte/PIA Agusan del Norte)
