Produktibo nga resulta sa pagpatuman sa TUPAD sa Ikaduhang Distrito sa Agusan del Norte, gipahiluna sa buhatan ni Kongresista Corvera
DAKBAYAN SA BUTUAN -- Giplastar sa buhatan ni Kongresista Dale B. Corvera sa 2nd District sa Agusan del Norte kauban ang mga representante sa Provincial Agriculture Office sa probinsya sa Agusan del Norte, Public Employment Service Officer, Agriculture Officer ug Environment and Natural Resources Officer sa Syudad sa Cabadbaran ug mga lungsod sa distrito ang trabaho sa mosuma sa 850 ka residente nga apil sa Batch 2 sa programang Tulong Panghapbuhay sa Disadvantaged/Displaced Workers (TUPAD).
Ang TUPAD programa nga gidumala sa Department of Labor and Employment (DOLE). Sa unang batch niini niadtiong Hulyo, gisalig sa buhatan ni Kongresista Corvera ang pagpahiluna sa 510 ka trabaho sa iyang distrito ug mahuman na ang maong batch niining bulana.
Mahinumdoman nga gipadayag ni Kongresista Corvera ang iyang sugyot nga hatagan unta ang mga patrabahoon sa TUPAD og buluhaton nga mahimong tinubdan sa panginabuhian sama sa mga trabaho nga lambigit sa pagpanguma, pagdevelop og enterprises ug uban pa.
Ning bag-o lamang, gidugang ni Kongresista Corvera ang sugyot nga tagaan og higayon ang mga displaced workers sa pangisda sa tamban nga naglisud niining higayona tungod sa grabeng pagkunhod sa kuha niini.
Kini ang napahiluna ning ikaduhang batch ug andam na ang mga lungsod aron sugdan ang pagpatuman niini. Upat sa mga LGUs – Kitcharao, Jabonga, Santiago ug Magallanes – magsugod na ugma.
Ubos sa TUPAD makatrabaho ang benepisyaryo sulod sa 15 ka adlaw sa sweldo nga Php350 ang adlaw. (Hulagway kuha ni Jenny Fabian ug Nibika Calixtro, Agusan del Norte 2nd Congressional District Office/PIA-Agusan del Norte)
