62 kanhi rebelde sa Agusan Norte, nakadawat ug pinansyal na tabang
DAKBAYAN SA BUTUAN -- “Kung mo ingon ta nga muuban ta sa goberno, muuban gyud ta”
Kini ang gi-ambit na hangyo ni Provincial Governor Ma. Angelica Rosedell M. Amante ngadto sa 62 kanhi rebelde sa Agusan del Norte nga nakadawat og pinansyal assistance kagahapon, Oktubre 13 ubos sa Livelihood Settlement Grant (LSG) gikan sa Department of Social Welfare and Development (DSWD) – Caraga.
Sumala pa ni Gob. Angel Amante, dili perpekto ang goberno apan nag-pursige ang tanan buhatan nga mahatag ang angayang serbisyo alang sa tanan. Apan anaa gihapon sa pagpaningkamot sa tao nga mo arang-arang ang kinabuhi sa matag usa.
“Kita karon nga naa nata sa goberno, maningkamot pud ta” matud pa ni Gob. Amante.
“Dili gyud solution nga makigpag-away
ta. Dili gyud solution nga ang inyong kinabuhi, inyong i-sugal” pasabot sa
gobernador.
Ang 62 ka mga kanhi rebelde nakadawat og Php20,000 matag usa isip suporta nga seed capital fund sa ilang napili nga panginabuhian o livelihood project.
Mismo si DSWD Undersecretary for Operations Group Jerico Francis L. Javier uban nila Provincial Governor Angel Amante, Assistant Secretary for Mindanao Affairs Arnel B. Garcia, Assistant Secretary for Statutory Programs Elaine F. Fallarcuna, ug FO Caraga Regional Director Mari-Flor A. Dollaga ang nanguna sa maong distribusyon ngadto sa mga former rebels.
Isip tubag, mi komiter ang usa sa mga benepisyaryo uban sa iyang mga kauban sa ilang kinasing-kasing nga pag-uban sa goberno. Lambigit niini, gihikayat usab nya iyang mga kauban nga maningkamot usab nga mapalambo ang ilang nadawatan nga capital.
“Manghinaot ko nga i-kinasing-kasing pud nato ang tabang sa gobyerno. Naghatag sa ato ang gobyerno og kantidad nga Php20,000 para sa atong panginabuhian. Dapat maningkamot ta unsaon paglago ani nga kantidad” sumala pa sa usa ka benepisyaryo.
Ang nasangpit nga programa, kabahin sa hiniusang lihuk sa tanang ahensya ug LGUs sa pang-goberno sa pag-implementar sa Executive Order No. 70 series of 2018. (Karen Decamotan, hulagway kuha ni Reuben Te, LGU Agusan del Norte/PIA Agusan del Norte)
