Tuesday, October 4, 2022

Livelihood assistance gipadangat sa 200 ka benepisyaryo sa 2^nd District sa Agusan del Norte

DAKBAYAN SA BUTUAN -- Mosuma sa 200 ka benepisyaryo sa segundo distrito sa Agusan del Norte ang gilantaw nga makapanukad sa pagbangon gikan sa hapak sa pandemya ug mga kalamidad gamit ang Php15,000 nga Livelihood Assistance Grant (LAG) nga gipahiluna sa buhatan ni Kongresista Dale B. Corvera nga napadangat sa matag usa kanila niadtong Septiyembre 29.

Gihimo ang maong pagpang-apod apod sa assistance sa Syudad sa Cabadbaran alang sa mga benepisyaryo gikan sa silangang bahin sa distrito sa buntag ug sa lungsod sa Buenavista alang niadtong gikan sa kasadpang bahin pagkahapon. 

Ang LAG pundo nga gidumala sa Department of Social Welfare and Development (DSWD). 

Nagahin kini sa distrito sa administrasyon ni kanhi Pres. Rodrigo Duterte sa paningkamot ni Sen. Bong Go. Gisalig ang pagpahiluna sa pagpadangat sa assistance sa mga benepisyaryo niini sa buhatan ni Kongresista Corvera kaabag ang mga Local Government Units (LGU) sa distrito.

Gamit ang maong pundo gilauman nga makamugna ang mga benepisyaryo og ubay-ubay nga ekonomikanhong kalihukan nga mahimong dugang tinubdan sa trabaho ug dugang kita sa mga lumulupyo.

Aron masundan ang paglambo sa panginabuhian sa mga benepisyaryo ubos ning maong programa, gipaneguro ni Kongresista Corvera pinaagi sa iyang representante nga nagbasa sa iyang mensahe, nga kabahin ang iyang buhatan sa support network nga maghatag og follow through technical assistance sa mga benepisyaryo.

Gipaneguro usab ni Kongresista Corvera nga padayon siyang mangalap og pondo aron makab-ot  sa distrito ang mas taas pa nga ang-ang sa paglambo. (Agusan del Norte 2^nd Congressional Office/PIA Agusan del Norte)