Lakang pagpataas sa produksyon sa isda sa Agusan del Norte, gihisgutan
DAKBAYAN SA BUUTAN -- Gihisgutan tali sa buhatan ni Kongresista Dale B. Corvera ug sa Bureau of Fisheries and Aquatic Resources (BFAR) kaniadtong Myerkules, Nobyembre 9, ang posibleng mga lakang aron maka produce ang Agusan del Norte og dugang lima ka milyon ka kilo nga isda matag tuig, ang nakitang kakulangon aron maabot sa probinsya ang sufficiency level ning pagkaon nga usa sa mga nag-unang tinubdan sa protina sa pagkaon sa mga residente niini.
Malangkubon ang nakitang mga lakang ni BFAR Regional Director Nilo Selim Katada, nga nangunay gyod pagbisita sa Congressional District Office (CDO) ni Kongresista Corvera aron mahisgutan ang concerns sa produksyon sa isda ug makamugna og partnership sa paghimo sa mga lakang pagsulbad niini.
Apil sa mga lakang nga nakita ni Direcror Katada mao ang pagpataas sa volume sa kuha sa municipal waters pinaagi sa pagpahapsay sa panahon sa pangisda. Nakita niyang mas mapatuman kini kung mapalig-on ang Butuan Bay Development Alliance (BBDA) o mamugna ang usa ka authority pinaagi sa usa ka balaud nga ipasa sa kongreso.
Kabahin sa nakita usab ni Katada pagpataas sa kuha sa isda sa municipal waters mao ang pagbutang og mga payaw aron naay kapundohan ang mga isda ug naay tinong kaadtoan ang mga mangingisda aron didto mangisda imbes nga maglatagaw lang bisan asa sa dagat.
Laing lakang nga iyang nakita mao ang pagpakusog sa mariculture, sama sa
mga fish cages nga gimontar sa mga baybayon sa Nasipit, Carmen ug Cabadbaran.
Buot usab ni Katada nga pakusgan ang suporta alang sa backyard fish farming pinaagi sa paghimong regular sa igong suplay sa fingerlings ug pagsuporta sa produksyon sa baratong bahug sa isda.
Sa bahin sa buhatan ni Kongresista Corvera, gipaambit niini nga suportado niini ang lakang pagpasaka og balaudnon nga magmugna og usa ka otoridad nga modumala sa Butuan Bay nga gawas sa Butuan, pangisdaan usab sa 10 ka mga lungsod sa probinsya. Naninguha na usab kini nga makakuha og pundo alang sa hatchery projects gikan sa kaulohan aron maseguro ang regular nga suplay sa igong gidaghanon nga fingerlings.
Hisgutan ang dugang pang mga detalye ning maong mga plano sa BFAR ug partnership sa buhatan ni Kongresista Corvera, sa probinsya ug uban pang mga ahensya sa mosunod nga mga adlaw. (Agusan del Norte 2nd Congressional District Office/PIA Agusan del Norte)
