Konsultasyon sa pagpalambo sa serbisyo sa publiko ug pribadong hospital, gihimo sa buhatan ni Kongresista Corvera
Apil sa mga nabisitahan sa inisyal nga pagtuyok mao ang mga hospital sa Syudad sa Cabadbaran nga mao ang Cabadbaran District Hospital ug ang Duay Hospital.
Naadtuan usab ang Kitcharao District Hospital, ang Jabonga Municipal Hospital ug mga pirbadong St. Joseph Infirmary Hospital ug Clinica Jesus Nazareno sa Magallanes.
Ang tanan sa nahinabi gikan ning maong mga hospital mapasalamaton kang Kongresista Corvera, ingon man kang Gob. Ma. Angelica Rosedell M. Amante, tungod sa suporta nga nahatag sa ilang tagsa-tagsa ka hospital. Alang sa probinysa, gipadangat ang maong suporta sa mga pasyente niini nga mga hospital kini pinaagi sa Integrated Social Development Assistance Program (ISDAP). Sa bahin sa buhatan ni Kongresista Corvera, gipadangat kini pinaagi sa alokasyon nga gipaagi ubos sa programang Medical Assistance for Indigent Patients (MAIP) sa Department of Health (DOH) ug sa Assistance to Individuals in Crisis Situation (AICS) sa Department of Social Welfare and Development (DSWD).
Sunod sa tuyo ni Kongresista Corvera nga mapahugtan pa ang partnerships aron mapalambo ug mapasayon pa alang sa mga lumulupyo ang pag-avail sa mga serbisyo, ang tanan nagpadayag usab og mga kakulangon, ilabina sa pasilidades ug personahe. Partikular nga kulang sa pipila ka hospital mao ang social worker nga maoy moatiman sa mga assistance nga makuha sa mga indigent patients gikan sa gobyerno. Apan andam silang ipalambo sa ilang bahin ang ilang tagsa-tagsa ka kapasidad aron mapalambo pa ang ilang tagsa-tagsa ka serbisyo.
Padayon ang pagtuyok sa mga personahe sa buhatan ni Kongresista Corvera sa mga hospital sa kasadpang bahin sa probinsya, ingon man sa Butuan diin nahimutang ang provincial hospital, ang Butuan City Medical Center og mga dagkung pribadong mga hospital pagseguro nga mahimo silang kabahin sa kampanya pagpalambo pa sa matang sa panerbisyo sa mga hospital sa distrito ug mga kasikbit nga dapit nga nagpadangat og hospital service sa mga lumulupyo niini. (Jenny D. Fabian, LGU Agusan del Norte/PIA Agusan del Norte)
