Monday, January 16, 2023

Cash incentives para sa barangay population volunteers sa Cabadbaran aprobado sa SP

DAKBAYAN SA BUTUAN -- Gideklarang balido sa Sangguniang Panlalawigan ang City Ordinance No. 2022-017 gikan sa Cabadbaran City nga nag-institutionalize sa Barangay Population Volunteers (BPVs) ug paghatag og cash incentives matag usa ka BPV sa 31 ka mga barangay sa maong syudad pina-agi sa Sanggunian Resolution No. 013-2023.

Naka-angkla ang maong ordinansa sa Memorandum Circular 2019-011 gikan sa Department of the Interior and Local Government nga nagmando sa probinsya, syudad ug munisipalidad sa paghatag serbisyo ug benipisyo sa mga barangay ug community volunteers aron mas mamahimong produktibo ang ilang pagpanerbisyo.

Nakalatid sa maong ordinansa nga kwalipikadong makadawat og P1,000 monthly cash incentives ang usa ka BPV kun mukabat na sa unom (6) ka bulan ang iyang pagpanerbisyo isip volunteer.

Gimbuhaton sa matag BPV ang pag-assist sa City Population Officer (CPO) sa pagpatuman sa tumong nga “Matatag, Maginhawa at Planadong Pamilyang Pilipino” lakip na usab ang pagtabang sa pagpahigayon og community-based demand generation ngadto sa magtiayon sa ilang barangay ug pagmonitor sa kahimtang sa wala matubag nga mga panginahanglan alang sa family planning.

Gipalabang kini atol sa ika-23rd sesyon regular niadtong Enero 10, 2022 sa pagduso ni Bokal Benjamin D. Lim, Jr. ang tsirman sa Committee on Barangay Affairs. (Robie Jane Sanoria, PLGU Agusan del Norte/PIA Agusan del Norte)