Mag-uuma sa Cabadbaran City, nakaani na og gulay, bunga sa ilang trabaho ubos sa TUPAD
DAKBAYAN SA BUTUAN -- Nakaani na og mga gulay sugod sa miaging semana ang mga sakop sa Mahaba Tribal Organization sa Barangay Mahaba, Cabadbaran City, bunga sa ilang kahago pag-uma sa usa ka luna niadtong miaging Disyembre ubos sa Tulong Panghanabuhay sa Ating Disadvantaged/Displaced Workers (TUPAD).
Mahinumduman nga usa ang Mahaba Tribal Organization sa nahimong benepisyaryo sa temporaryong trabaho ubos sa TUPAD, usa ka programa sa Department of Labor and Employment (DOLE) nga gipatuman sa distrito sa pakigtambayayong sa buhatan ni Kongresista Dale B. Corvera.
Ang laing mga grupo sa Cabadbaran City nga apil usab sa nahatagan og temporaryong trabaho ug nakaani na usab ning higayona mao ang Mamanwa-Sypon Farmers Indigenous Peoples Organization, Lusong Manobo Farmers Inc. ug ang Dagsanay Farmers Association sa Barangay Putting Bato.
Ubos sa TUPAD makatrabaho ang usa ka displaced o disadvantaged workers sa tag Php350 ang adlaw sulod sa 15 ka adlaw.
Sa tuyo nga mahimong produktibo gyod ang mangapil sa TUPAD, gihimong usa sa mga panukaran ni Kongresista Corvera paghimo niini sa usa ka lugar nga naa gyoy produktibong trabaho sama sa pagpananum og utanon o high value crops imbes nga magsilhig-silhig ra sa kalsada.
Laing kaabag sa buhatan ni Kongresista Corvera pagpatuman sa TUPAD sa iyang distrito sa miaging tuig ang Syudad sa Cabadbaran pinaagi sa City Agriculture Office sa pangpangulo ni City Agriculturist Maria Arcile Soria nga maoy naghatag ug giya unsaon nga mapalambo ang ilang umahan.
Kaabag usab ang Probinsya sa Agusan del Norte pinaagi buhatan sa Provincial Agriculture office sa pag pangulo ni Alvin Aclan, ang Provincial Agriculturist, nga naghatag ug mga abono ug fertilizer.
Mosuma sa 2,210 ka underemployed ug unemployed nga residente sa siyam ka lungsod ug usa ka syudad sa distrito ang napatrabaho sa buhatan ni Kongresista Corvera ubos sa TUPAD sa unang unom ka bulan sa iyang termino sa miaging tuig. Gipaningkamotan karon sa kongresista nga makakalap ug mas dakudakong pundo aron makahatag og temporaryong trabaho sa mas daghan pang residente sa distrito. (Jenny D. Fabian, Agusan del Norte 2nd Congressional District Office/PIA Agusan del Norte)
