Pinaka-unang AguSerbisyo sa lungsod sa Tubay, natagamtaman sa upat ka barangay
DAKBAYAN SA BUTUAN -- Sa unang higayon, natagamtaman sa mga residente sa upat (4) ka mga coastal barangays sa lungsod sa Tubay ang mga nagkalain-laing social ug economic development support services gikan sa Probinsyal nga Panggamhanan sa Agusan del Norte pinaagi sa gipahigayong AguSerbisyo Caravan sa pagpangulo ni Gob. Angelica Rosedell M. Amante kaabag ang buhatan ni Kong. Dale B. Corvera.
Sa maong caravan, gidagsa sa liboang lumolupyo ang maong kalihukan niadtong Pebrero 10 nga gilangkuban sa mga barangay sa Lawigan, Binuangan, Tagpangahoy, ug Tinigbasan.
Direktang nahimamat sa gobernador ang mga katawhan sa maong lugar lakip na ang dali nga pag-tubag sa lain pang panginahanglanon niini.
Sumala pa sa mga municipal, barangay opisyales ug mga residente sa Tubay, sa dugay’ng higayon, karon pa nasinati sa mga Tubaynon ang pinaka-unang AguSerbisyo Caravan sa lungsod ubos sa hiniusang liderato sa administrasyon ni Amante, Corvera ug Mayor Jimmy Beray.
Sa “AguSerbisyo” gipadangat ang mga libreng serbisyo ngadto sa gibana-bana nga 900 ka panimalay mao ang mga serbisyong medikal, pagpadangat ug mga livelihood assistance ug food packs, serbisyong panglawas ug uban pa.
Sa buhatan sa Provincial Health Office (PHO) uban sa doktor sa Provincial Hospital sa pagpanguna ni Dr. Odelio Ferrer, adunay medical consolations, ibot sa ngipon, COVID vaccination, pediatric services, tuli ug minor surgery.
Sa buhatan usab sa Provincial Social Welfare and Development (PSWD) sa pagpanguna ni Dr. Silver Joy Tejano nanghatag usab ug mga 130 ka eyeglasses, 2 ka quad canes, 2 ka crutches ug 1 ka walker, mga medisina ug 1,500 ka food packs.
Sa bahin usab sa Provincial Agriculture Office (PAO) sa pagpanguna usab ni Alvin Aclan, gipadangatan usab ug 206 ka vegetable seeds sama sa sweet pepper, petchay ug squash ug laing 224 ka mga fruit trees seedlings sama sa lubi, guava, guyabano, kape ug cacao.
Nagpadangat usab ug serbisyo ang Provincial Veterinary’s Office (PVET) sa pagpangulo ni Dr. Belen M. Aruelo sama sa konsultasyon, deworming, anti-rabies vaccination ug pagpanghatag ug water soluable nga bitamina.
Aktwal usab naghatag ug libreng training ang buhatan sa Provincial Disaster Risk Reduction and Management Office (PDRRMO) sa pagpangulo ni Erma R. Suyo, sa hands on Cardiopulmonary resuscitation (CPR), bandaging, ug first-aid orientation. Dali usab mi-responde ug first-aid ang mga Young Operatives in Urgency Nurturing Goodwill Agusan del Norte Emergency Response Team (YOUNG ADNERT) ngadto sa pipila ka residente niini.
Kauban usab sa probinsya ang buhatan sa Technical Education and Skills Development Authority (TESDA)-Agusan del Norte nga naghatag ug libreng body massage, manicure and pedicure, ug profiling alang sa mahitabong community based training ug livelihood training.
Uban usab ang ADNPPO alang usab sa ilang Operation Licealiz.
Gawas sa gobernador og mayor sa Tubay, personal usab miadto ang pipila ka board members sa lalawigan sa Agusan del Norte, Brig. Gen. George Banzon, Commander sa Philippine Army’s 901st Infantry Brigade, Agusan del Norte Police Provincial Office (ADNPPO) chief Col. Filemon Pacios, mga kauban sa Sangguniang Bayan, mga division ug department chiefs sa kapitolyo, ug mga kapitan ug kagawad sa nagkalain-laing barangay. (Karen Decamotan, hulagway kuha ni Reuben Sanchez/PIA Agusan del Norte)
