Mga miyembro ng LGBTQIA+ community sa Caraga region, nakiisa sa gobyerno laban sa CTG
By Jennifer P.
Gaitano
File photo
LUNGSOD NG BUTUAN -- Isang malaking oportunidad para sa mga miyembro ng lesbian, gay, bisexual, transgender, queer, intersex, at asexual+ (LGBTQIA+) community ang isinagawang online activity na pinamagatang "Perplexing the truth: A forum on communist-terrorist group exploitation of the LGBTQIA+ community," sa pamamagitan ng zoom platform at livestreaming sa Facebook page ng Philippine Information Agency Caraga.
Dahil dito, naisiwalat ng mga miyembro ng LGBTQIA+ kung paano sila nalinlang ng communist-terrorist group, maging ang kanilang ginampanang tungkulin sa kilusan at kanilang mga paghihirap na siyang nag-udyok sa kanila na magbalik-loob sa gobyerno.
Ayon kay “Joy” na isang dating rebelde, nararapat na kilalanin at respetuhin ang kanilang karapatan sa lgbtqia+ community dahil marami din naman silang naibabahaging magagandang inisyatibo sa lipunan at hangad lamang nilang mamuhay ng masaya at mapayapa.
“Ang LGBTQIA+ community ay may kontribusyon din sap ag-unlad ng bansa. Nananawagan tayo hindi lamang sa mga LGBTQIA+ kung hindi pati na rin sa lahat ng kabataan na huwag hayaang malinlang ng komunistang grupo na magdadala sa inyong sarili sa kapahamakan at pang-aabuso. Dahil tayo sa LGBTQIA+ ay advocates para sa gender equality at kaya nating labanan ang anumang karahasan at diskriminasyon,” ani Joy.
“Nawalan ako ng tiwala at lakas na ipagpatuloy pa ang aking tungkulin sa loob ng kilusan dahil gusto ko na talagang makauwi sa amin at hindi na mahirapan,” dagdag ni Julie na isa ring dating rebelde.
Pagtitiyak naman ni regional director Edsel Batalla ng National Intelligence Coordinating Agency (NICA) Caraga, na mas paiigtingin pa ng Regional Task Force to End Local Communist Armed Conflict (RTF-ELCAC) ang kampanya laban diskriminasyon, inequality, at gender-based violence sa lahat ng sektor.
“Maraming salamat sa boluntaryong pagbahagi ng katotohanan. Ikinalulungkot naming ang inyong napagdaanang paghihirap mula sa kamay ng CTG. Kaya mahalaga ang ating pagkakaisa sa paglaban at pagsugpo ng ano mang uri ng karahasan at pang-aabuso. Nawa’y patuloy nating isulong ang pantay-pantay na respeto at pagpapahalaga sa bawat isa,” pahayag ni Dir. Batalla. (JPG/PIA-Caraga)
