Mga nakatrabaho sa ika-upat nga hugna sa TUPAD sa RTR, giswelduhan na
Kabahin ang mga nasuweldoan karon sa 180 na tanan nga nakatrabaho sa RTR, ug sa 3,641 na tanan nga nakatrabaho sa tibuok distrito sukad sa miaging tuig.Sa kinatibuk-an, mokabat sa P21.35 milyones na ang naangkat gikan sa nasudnong pundo alang sa upat ka hugna sa TUPAD.
Gipasabot usab sa kongresista nga sentro sa mga gitrabaho karon ubos sa TUPAD mao kadtong magsilbing pundasyon alang sa mas sustenidong trabaho ug kapanginabuhian. Iyang dugang nga gisubay sa mga gipatrabaho sa TUPAD ang prinsipyo nga gipatuman ubos sa AGUSAN UP! Partikular nga gitutokan sa RTR ang mga buluhaton pagmugna sa core processing project niini ubos sa maong kampanya sa pagpalambo nga mao ang “Beyond Rice.”
Niining maong kalambuan mapasalamaton kaayo si Gob. Ma. Angelica Rosedel M. Amante, nga mitambong usab sa pagpahigayon sa maong payout kauban sila si RTR Mayor Richard Daquipil, Sangguniang Bayan Nadette Daquipil ug ubang mga opisyal sa lungsod.
Bunga ang walay babag nga pagsulod sa mga proyekto sa probinsya, mga lungsod ug mga barangay sa hiniusang liderato karon sa lugar, sumala pa ni Gob. Amante, ug nanghinaut siya nga magpabilin ug mapahugot pa gyod kini.
Ugma, Abril 19, laing 102 sa Jabonga, 118 sa Santiago ug 106 sa Tubay ang makadawat usab sa ilang sweldo. Sa Huwebes makadawat sa ilang sweldo ang 331 nga nakatrabaho sa Cabadbaran City. Kabahin sila sa 3,641 na tanan nga nakatrabaho na sa distrito.
Ubos sa TUPAD makatrabaho ang usa ka unemployed o underemployed sa tag P350 ang adlaw sulod sa 15 ka adlaw o P5,250 matag usa sa usa ka hugna. Ang gidaghanon sa makatrabaho sa usa ka lungsod nagadepende sa gidaghanon sa population o porsiyento niini kung itandi sa kinatibuk-ang populasyon sa tibuok distrito.
Panapos ni Corvera nga padayon siyang mangalap og dugang pang pundo aron padayong makapadagan og TUPAD ug uban pang serbisyo sa distrito. (Agusan del Norte 2nd Congressional District Office/PIA Agusan del Norte)
