Pondo sa TUPAD sa Agnor, gobernador mapasalamaton sa kongresista
Base sa taho sa buhatan sa ikaduhang distrito sa Agusan del Norte, mokabat sa Php21.35 milyones ang kinatibuk-ang naangkat ni Kongresista Dale Corvera gikan sa nasudnong panudlanan sa upat ka hugna sa TUPAD pay-out sulod sa iyang termino. Sa pagkakaron, mosuma sa 3,641 ka mga benepisyaryo ang nakadawat ug nakapahimulos sa nasangpit nga programa.
“Thank you gyud kaayo (Cong.) Gov. Dale, thank you gyud kaayo. Permi ko nagpasalamat kay Gov. Dale ani kay kung wala nagkugi si Gov. Dale, wala tay mga TUPAD all over Agusan del Norte” sumala pa ni Gov. Angel Amante.
“Ang TUPAD, programa ni sa atong National Government nga gipaagi pud ni sa atong Kongresista, so tanan TUPAD all over Agusan del Norte, pagpaningkamot gyud ni sa atong Congressman. So thank you gyud kaayo Gov Dale for doing this sa atong entire Agusan” sinsirong paambit ni Gob. Angel Amante ngadto kay Kong. Dale Corvera.
Sa ika-upat nga hugna sa TUPAD pay-out, nakadawat ang laing 71 ka residente sa lungsod sa RTR kagahapon, Abril 18 sa ilang sweldo nga Php5,250 o tag 350 kada adlaw matag usa sulod sa 15 ka adlaw nga ilang gitrabaho.
Sumala pa ni Kong. Dale Corvera, tumong niini nga programang TUPAD nga makatrabaho ang mga Agusanons subay sa prinsipyo nga gipatuman sa programang AGUSAN UP!, diin tutukan niini ang pang-ekonomikanhong trabaho aron mag silbi nilang tinubdan o pundasyon alang sa mas sustenidong trabaho ug panginabuhian.
Dugang ni Kong. Corvera, usa lamang kini sa walay babag nga lakang nga gibuhat sa goberno nga nahimong bunga sa pagpaningkamot sa hiniusang liderato sa kongreso, probinsya, mga lungsod ug mga barangay sa lalawigan sa Agusan del Norte. (Karen Decamotan, PLGU Agusan del Norte/PIA Agusan del Norte)
