Pagpamakuna kontra tipdas, rubella, polio, gisugdan na
DAKBAYAN SA BUTUAN -- Gilusad niadtong Mayo 2 ang Chikiting Ligtas Healthy Pilipinas isip nationwide campaign kalabot sa Measles Rubella-Oral Polio Vaccine Supplemental Immunization Activity kon MR-OPV SIA, sa Robinsons Mall sa Butuan City.
Ang Chikiting Ligtas Healthy Pilipinas usa ka dugang nga bakuna kontra tipdas, Rubella, ug Polio nga kabahin sa kampanya aron masiguro nga protektado ang mga kabataan batok na niining sakit.
Usa ang inahan nga si Lyca Jane Moran nga gidala ang iyang dos-anyos nga anak sa paglusad sa Chikiting Ligtas.
"Dugang mani nga proteksyon sa ila labi na karon nga tag-init, ang tipdas uso na ug sa Polio pud, naa nay nag positive sa Pilipinas, mao likay ta nga masakit ang bata," pahayag ni Moran.
Ihatag sa mga batang nag edad 0 hantud 59 ka bulan ang Oral Polio Vaccine ug 9 hangtud 59 ka bulan ang Measles-Rubella nga bakuna.
Target sa Butuan City nga mabakunahan ang 40,269 ka mga kabataan sa Oral Polio Vaccine ug anaa sa 34,467 ka mga bata ang mahatagan og Measles-Rubella Vaccine.
Makita ang mga health workers sa mga barangay sa temporary fixed post sama sa mga waiting shade area ug aduna usab door-to-door nga kampanya aron mas mapaduol ang paghatag sa bakuna.
Suportado ni Butuan City Mayor Ronnie Vicente Lagnada ang Supplemental Immunization nga kampanya. Gi-awhag niya ang mga ginikanan nga adunay mga anak nga sulod sa required age nga pabakunahan ang ilang mga anak aron masiguro ang proteksyon niini. (Butuan City PIO/PIA Agusan del Norte)
