Gov't internship sa AgNor gipahiluna sa buhatan sa kongresista
DAKBAYAN SA BUTUAN -- Gisugdan na sa Congresional District Office (CDO) ni Kongresista Dale B. Corvera ang final round sa mga lungsod sa probinsya sa Agusan del Norte aron uyonan ang mga preparasyon kalabot sa Government Internship Program (GIP) sa dili pa kini ilusad sa Hulyo 3 ning tuiga.
Ang GIP programa nga gidumala sa Department of Labor and Employment (DOLE), ang partner sa CDO ni Kongresista Corvera sa pagpatuman ning maong batch sa Agusan del Norte. Apil sa gi-finalize sa maong pagtuyok ang mga 205 ka mga interns nga iapil ning maong proyekto nga molungtad og tulo ka bulan.
Apil usab sa gihisgutan sa mga mayor sa mga lungsod mao ang mahimong trabahoon sa mga interns sulod sa maong higayon nga sila magtrabaho.
Sa konsultasyon sa provincial government kansang direksyon sa paglambo maoy usab gitan-aw sa CDO, nauyonan nga ang mga interns mosentro sa trabaho pag-mugna og economic data base sa mga lungsod ug unya sa probinysa nga mag-contain sa mga datos gikan sa 169 ka barangay.
Gikan sa mahipos nga mga datos himoon sa provincial level ang industry profiles sa wood, coffee, abaca, banana, cassava, mango and other fruits, ang pre-identified priority commodities, ug uban pang commodities.
Gikan ning maong profiles himoon usab unya ang updated nga Plant and Process for Prosperity (Agus3Ps) Campaign Plan hangtud 2027.
Ang nagdagan nga mga proyekto ning maong programa nga apil sa kampanya sa pagpalambo nga AGUSAN UP! mao ang magkaluhang proyektong Plant! Plant! Plant! ug Process! Process! Process!
Nauyonan sa buhatan sa kongresista ug gobernador nga ipursige ang maong mga proyekto aron makab-ot ang mas taas pa nga estado sa paglambo.
Base sa han-ay sa nakitang trabahoon, gilantaw nga usa ang kuhaon nga enumerator sa matag usa sa 169 ka barangay ug ang uban magsilbing coordinators sa mga lungsod ug processors sa data nga makabase sa mga buhatan sa kapitolyo ug sa CDO nga maoy usab mag andam alang sa mga workshops unya. .
Naadtoan na ang mga lungsod sa Buenavista, Nasipit ug Carmen. Gilantaw nga malibot ang tanang lungsod hangtud sa Biyernes, Hunyo 9. (Agusan del Norte Second District Congressional Office/PIA Agusan del Norte)
