FRs nakadawat og livelihood toolkits sa AgSur
Gilangkuban kini sa singkwenta ka mga kleyente ug ang kinse niini mao ang mga FRs nga giubanan sa mga personahe sa taga 26th Infantry Batallion.
Uban ni Gobernador Santiago Cane, Jr. sila Patricia Anne Plaza isip representante ni Representative Adolph Edward Plaza, Cecenia Tejadillo isip representante ni Representative Alfel Bascug, Divina Lagumbay, manager sa Public Employment Service Office (PESO); Novielita Dispo. direktor sa Agusan del Sur School of Arts and Trades (ASSAT), Lieutenant Colonel Sandy Majarocon ang battalion commander sa 26th IB, ug mga personahe sa TESDA AgSur, sa pagpahigayon sa panghatag sa mga toolkits ngadtu sa mga katawhan nga mihuman sa Training sa Carpentry National Certificate (NC) II.
Gibutyag ni Director Millan ngadto sa mga midawat og toolkits nga mapasalamaton gayud kanunay ang TESDA Agusan del Sur kay tungod sa hugot ug walay puas nga suporta sa Team Eddiebong sa ilang mga programa ngadtu sa mga katawhan.
"Ang buhatan sa TESDA Agusan del Sur mapasalamaton gayud kanunay ngadtu sa team Eddiebong diin hugot gayud ang pag suporta nina sa mga programa para sa kaayuhan sa mga katawhan sa probinsya," mensahe ni PD Millan.
Mipadayag usab si Millan nga kinahanglan nga ampingan gayud ang mga toolkits nga gipanghatag kay para aduna nay panginabuhian ang matag tawo nga makadawat sa maong mga himan.
"Giawhag
ko kamong tanan nga unta dli ninyu ipangbaligya kanang inyung nadawatan nga mga
toolkits kay sa ingun aron duna kamoy source sa inyung pangwarta sa inyu
kinabuhi," dugang pa sa director.
"On behalf of our Regional Director, Jerry G. Tizon, JD, gipaabut namo ang kinasing-kasing nga pagpasalamat ngadtu sa mga liderato sa probinsya nga diin wala gayud puas sa pag suporta sa mga programa sa TESDA para sa kaayuhan ug kalambuan sa mga katawhan," katapusang pulong ni Millan.
Mipadayag usab og mensahe si Gob. Cane ngadtu sa mga katawhan nga naka dawat ug toolkits. Ug iyang gipahimangnuan nga ampingan gayud ang mga butang nga diin ilang mapangitaan ug panginabuhian.
"Aduna na gayud kamoy mga gamit sa pagpanday nga gihatag sa gobyerno para gayud kamo adunay panginabuhian sa inyung tagsa tagsa ka panimalay. Ampingan ninyu kana kay talagsaon lang kana nga higayon nga gihatag sa gobyerno," matud sa gobernador.
"Kung inyo man gali nang ipangbaligya nga masayran namo, kami mismo magpakaso kaninyu og dli namo usab makadawat pa og benispisyo sa gikan sa gobyerno nga sama niana," dugang ni Gob. Cane. (JPG/Kent Eldon Daligdig, PIA-Agusan del Sur)
