Tuesday, 25 July 2023

Paglambo sa komunidad sa IPs, gibansay sa Cabadbaran City

CABADBARAN CITY, Agusan del Norte -- Gilusad ang mga pagbansay nga magmugna sa Village Level Enterprises nga tan-aw ni Kongresista Dale Corvera mahimong panukaran sa usa ka hiniusang lihuk pagpatunhay sa kalinaw ug pagpanukad sa mapadayonong paglambo sa komunidad sa Indigenous Peoples (IP) sa Barangay Mahaba, syudad sa Cabadbaran.  

“Resulta kining maong proyekto, una sa tanan, sa panaghiusa tali sa atong mga igsoong IPs, sa probinsyal ug lokal nga panggamhanan, sa distrito ug sa mga ahensya sa nasudnoing panggamhanan nga nakakita sa panginahanglan nga himoon kini,” sumala pa ni Kongresista Corvera pinaagi sa usa ka mensahe nga gibasa sa iyang representante sa maong okasyon.

“Ang kalampusan ning maong proyekto nga ilusad ta karon mahimong panukaran sa mas malukpanon pang ekonomikanhong kalihukan, ug ngadto sa mas taas pa nga estado sa paglambo,” hisgot  ni Corvera.

Dugang pasabot ni sa kongresista nga layo ang maabot kung ang pagpaangat sa kahimtang sa mga benepisyaryo sa proyekto ang hisgutan ug niiini kinahanglan kaayo ang panaghiusa ug pagtinabangay, apil na ang padayon nga pagpatunhay sa kalinaw sa komunidad sa mga IPs.

Nanguna si Gob. Ma. Angelica Rosedell Amante ug Mayor Judy Chin Amante sa mga mitambong sa paglusad ning maong proyekto nga nagsilbi usab nga nag-unang kalihukan sa pagsaulog sa kapolisan sa Cabadbaran sa Police Community Relations Month. (Charlyn Hernandez Laurea, Agusan del Norte 2^ndCongressional District Office/PIA Agusan del Norte)