Internship program, educational assistance gilunsad sa AgNor
DAKBAYAN SA BUTUAN -- Mosuma sa 205 ka interns sa tibuok probinsya sa Agusan del Norte ang nagsugod sa ilang trabaho niadtong Hulyo 3, ubos sa Government Internship Program (GIP) nga hiniusang gilunsad sa Congressional District Office ni Kongresista Dale B. Corvera, sa buhatan ni Gob. Ma. Angelica Rosedell M. Amante ug sa Department of Labor and Employment (DOLE) sa may covered court sa provincial capitol sa Butuan City, kauban ang mga mayor sa mga lungsod ug sa ubang mga ahensya sa nasudnong panggamhanan.
Mokabat usab sa 120 ka indigent senior high school graduating ug college students ang midawat karon og tag P4,000 matag usa, kabahin sa 2,500 tanan nga nakadawat ubos sa Education Assistance Program ubos sa Assistance for Individuals in Crisis Situation (AICS) nga program sa Department of Social Welfare and Development (DSWD).
Mahinumdoman nga nakapahiluna si Kongresista Corvera pinaagi sa DOLE og P5 milyon nga pundo alang sa GIP ug sa pakig-alayon sa provincial government sa Agusan del Norte ubos kang Gov. Amante, nga mitampo usab og pundo alang sa mga galastuhan gawas sa sweldo sa mga interns, ug namugna kining maong partikular nga internship.
Sa konsultasyon sa provincial government kansang direksyon sa paglambo maoy gitan-aw sa CDO, nauyonan nga ang mga interns mosentro sa trabaho pagmugna og economic data base sa mga lungsod ug unya sa probinsya nga mag-contain sa mga datos gikan sa 169 ka barangay niini.
Gikan sa mahipos nga mga datos himoon sa provincial level ang industry profiles sa wood, coffee, abaca, banana, cassava, mango and other fruits, ang pre-identified priority commodities. Sa maong profiles himoon usab unya ang updated nga Plant and Process for Prosperity (Agus3Ps) Campaign Plan hangtud sa tuig 2027.
Ang nagdagan nga mga proyekto ning maong programa nga apil sa kampanya sa pagpalambo nga AGUSAN UP! mao ang magkaluhang proyektong Plant! Plant! Plant! ug Process! Process! Process!
Nauyonan sa buhatan ni Kongresista Corvera ug Gob. Amante nga ipursige ang maong mga proyekto aron makab-ot ang “Mas Taas Pa nga Estado sa Paglambo”.
Base sa han-ay sa mga trabahoon, tag-usa ka enumerator ang gikuha sa matag usa sa 169 ka barangay sa probinsya. Ang uban sa mga interns magsilbing coordinators sa mga lungsod ug processors sa data nga makabase sa mga buhatan sa kapitolyo ug sa CDO. (Agusan del Norte 2nd Congressional District/PIA Agusan del Norte)
