Wednesday, 19 July 2023

Pagpalambo sa AGUSAN UP!, giawhag 

DAKBAYAN SA BUTUAN -- Dungan sa paglusad sa probinsya sa Agusan del Norte sa "Kadiwa ng Pangulo" kaniadtong Hulyo 17, giawhag usab sa buhatan ni Kongresista Dale B. Corvera ang stakeholders sa programa nga tutokan ang pagpakusog sa pagpananum ug pagproseso sa mga pagkaon aron ma seguro ang regular nga suplay niini.

Sa maong paagi usab mobaratu ang presyo sa pagkaon, sumala sa buhatan sa Kongresista, makahatag og dugang trabaho, makamugna og dugang  bahandi gikan sa value added sa mga produkto ug mapaangat ang kita sa mga Agusanon.

Gipaambit sa buhatan ni  Corvera nga dakung suporta sa Kadiwa program ang magkaluhang proyektong Plant! Plant! Plant! ug Process! Process! Process! ubos sa AGUSAN UP!, ang kampanya sa pagpalambo nga gisugdan ni  Corvera sa gobernador pa siya niadtong 2019 ug ipadayon ni Gob. Ma. Angelica Rosedell M. Amante karon.

Ubos sa AGUSAN UP! mao ang proyektong Food Security Enhancement nga kabahin sa programang Plant and Process for Prosperity. Dinhi gipunting nga maka-develop og kapin sa 10,000 ektaryas isip dugang sa mga luna nga giuma karon alang sa mga pagkaon.

Partikukar sa gulay, gipunting nga maka-develop og mosuma sa 700 ektaryas nga vegetable farms gikan sa mga 200 ektaryas lang niadtong 2020 aron mahimong regular ang suplay sa gulay. (Charlyn Hernandez Laurea, Agusan del Norte 2^nd Congressional District/PIA Agusan del Norte)