Friday, 11 August 2023

1% sa badyet sa Carmen igahin sa senior citizens

DAKBAYAN SA BUTUAN -- Isip pag-ila sa utang kabobot-on nga nahatag sa mga kaigsu-unang senior citizens, ang lokal nga panggamhanan sa lungsod sa Carmen, Agusan del Norte nag-alokar og labing menos usa ka porsyento (1%) sa kinatibuk-ang pundo sa budget sa munisipyo alang kanila pinaagi sa Municipal Ordinance No. 16, series of 2023.

Ang maong lakang nga gipangamahanan ni SB member Wilfredo T. Taglucop gi-aprobahan sa Sangguiang Panlalawigan sa Agusan del Norte ug nagtinguha nga kini ma-implementar sugod sa tuig 2024.

Subay kini sa Joint Circular No. 003, pinetsahan og Abril 28, 2003 sa Department of Budget and Management ug sa Department of Social Welfare and Development diin naghatag alang sa pagpatuman sa Seksyon 29 sa General Appropriations Act of FY 2003, nga nag-ulohan, "Setting Aside One Percent of the Government Agency Budget for the Programs, Project related to Senior Citizens and the Disabled."

Nahisubay usab kini sa Artikulo XV, Seksyon 4 sa 1987 Konstitusyon sa Pilipinas nga naglatid nga, "It is the duty of the family to take care of its elderly members while the state may design programs of social security for them."

Ang mga senior citizens sakop sa usa ka espesyal nga sektor nga nanginahanglan ug pinalabi nga pagtagad sa gobyerno ug aron mapauswag ang sosyal nga ekonomikanhon ug espirituhanon nga aspeto sa ilang kinabuhi ingon usab tugutan sila nga matubag ang ilang mga kabalaka ug uban pang hinungdanon nga mga isyu nga giatubang nila pinaagi sa pagtukod sa mga takus nga proyekto, programa, ug mga kalihokan nga makabenepisyo kanila.

Gi-aprobahan ang nasangpit nga ordinansa pinaagi sa SR. No. R-396-2023 sa pagduso ni Larry F. Bautista, tsirman sa Committee on Social Welfare Population Development. (Reel Francisco Deligero, PLGU Agusan del Norte/PIA Agusan del Norte)