P4M 'marketing capital' sa abaca nadawat sa coop sa AgNor
Gitumbok sa probinsya nga ang San Isidro Upland Farmer's Multipurpose Cooperative (SIUFMULCO) sa Baranggay San Isidro, Santiago, Agusan del Norte mao ang hatagan og suporta pinaagi sa tabang pinansyal alang sa pag-implementar sa marketing capital sa abaca enterprise.
Tumong niini'ng proyekto ang pagpalig-on sa sektor sa agrikultura pinaagi sa modernisasyon nga mga pamaagi aron makab-ot ang seguridad sa pagkaon, paghupay sa kapobrehon, pag-uswag sa kita ug ginansya ug maingon man ang global competitiveness ug sustainability. Nakita nga ang SIUFMULCO naay kapasidad nga mag patuman niining programa sa probinsya. Nailhan kini pinaagi sa iyang mga paningkamot sa pagpatuman sa mga proyekto sa agrikultura sa consolidated fiber, nakamugna og mga trabaho, panginabuhian ug pagpalambo sa kita sa mga mag-uuma.
Madawat niini ang kantidad nga P4,000,000 gikan sa probinsya pinaagi sa pag loan para suportahan ang maong proyekto lakip usab niini ang mga technical concerns para mahimong hapsay ang pagpatuman niini.
Alang sa saktong implementasyon, gihatagan og otoridad sa Sangguniang Panlalawigan si Gob. Ma. Angelica Rosedelle M. Amante alang sa pagpirma sa Memorandum of Agreement tali sa maong kooperatiba.
Isip pag-ila sa pundo nga nadawat gikan sa probinsya, nahisulat sa maong MOA ang SIUFMULCO kinahanglang mosumitir sa mga giaprobahan nga mga proposed projects, magtipig ug magmintinar sa pinansyal nga mga rekords sa mga transakyon para sa eksaminasyon sa representate sa Provincial Agriculture Office (PAO) ug himoong magamit ang tanang rekords alang sa inspeksyon ug ebalwasyon nga mga katuyuan sa probinsya.
Naaprobahan ang maong lakang pinaagi sa SR. No. 399-2023 nga gi-duso ni SB Erwin L. Dano, tsirman sa Agriculture and Agrarian Reform nga komitiba. (Reel Francisco Deligero, PLGU Agusan del Norte/PIA Agusan del Norte)
