Pagbansay isip pangandam sa malukpanong pagpananum, nagpadayon
DAKBAYAN SA BUTUAN -- Nagpadayon ang 10 ka adlaw nga pagbansay sa pagpananum og gulay ug mga kahoy nga falcata ug narra sa 50 ka lumulupyo sa Balaatan, Camagong, Nasipit ug Simbalan, Buenavista, Agusan del Norte isip pagpangandam sa malupkanong pagpananum ubos sa kampanyang Plant! Plant! Plant! sa AGUSAN UP! sa mosunod nga mga adlaw.
Ang mga nagbansay apil sa 646 tanan nga apil sa "Pagbansay Ngadto sa Paglambo" nga hiniusang gipahiluna ni Kongresista Dale B. Corvera ug Gob. Maria Angelica Rosedell M. Amante pinaagi sa Special Training for Employment Program (STEP) pinaagi sa Technical Education and Skills Development Authority (TESDA).
Human ning maong mga pagbansay, apil sa manguna ang mga partisipante niini sa pagpananum diin gipunting nga makatanum sa 100,000 ektaryas nga commercial trees, 25,000 ektaryas nga high value crops ug 700 ektaryas nga regular vegetable farms sa mosunod nga 10 ka tuig. Mosuma sa 18 ektaryas ang gikometer sa mga sakop sa tulo ka mga organisasyon nga nagbansay sa Simbalan ug 14 ektaryas sa mga nagbansay sa Balaatan isip pasiunang tampo sa kampanya sa pagpananum pagakahuman sa pagbansay.
Himoon ang mga pagpananum human sa pagbansay ubos sa programang Tulong Panghanapbuhay Para sa Disadvantaged/Displaced Workers (TUPAD) nga hiniusa usab nga gipahiluna sa kongresista ug gobernador sa probinsya, ug kaabag Department of Labor and Employment.
Ang AGUSAN UP! gilusad sa probinsya niadtong 2019 ug hiniusang ipursige karon nila ni Kongresista Corvera ug Gob. Amante. (Hala Bira SA Kongreso/PIA Agusan del Norte)
