MSMEs giaghat nga ipursige ang pagpalambo sa negosyo
DAKBAYAN SA BUTUAN -- Dugang pang producers sa tibuok Caraga ang giaghat ni Kongresista Dale Corvera sa Agusan del Norte nga padayong ipursige nga modaku ang halin sa ilang produkto aron mouswag ang ilang tagsa-tagsa ka negosyo ug makatampo sa kinatibuk-ang ekonomikanhong paglambo sa rehiyon.
Gihimo sa kongresista kining maong pag-aghat pinaagi sa iyang representate nga maoy mitambong alang kaniya sa pag-abli sa 9th “Buy Caraga by Caraga” Trade Fair and Exhibit sa SM Butuan City niadtong Diyembre 6.
Pasabot ni Kongresista Corvera pinaagi sa iyang representante sa maong okasyon nga nga tanang ekonomikanhong kalihukan walay kwenta kung walay halin.
Mahinumdoman nga gipaambit ni Kong. Corvera sa laing trade fair karong bag-o lamang nga sa gobernador pa siya sa Agusan del Norte (2019-2022) nag-abag sila Gob. Ma. Angelica Rosedell M. Amante, ang kongreista sa maong panahon nga mao nay gobernador karon, pagpanguna sa kampanya sa pagpalambo nga gitawag og “AGUSAN UP!”
Sa bahin sa ekonomikanhong pagpalambo sa maong kampanya, ang main component projects mao ang naila na karon nga Plant! Plant! Plant! ug Process! Process! Process. Sunod kini sa dugay na nga panglantaw sa probinsya nga himoong “Agri-Processing Center” ang Agusan del Norte pag-abot sa tuig 2027.
Ang wala kaayo nahisgutan sa pagdagan sa kampanya ug buot ni Corvera nga makita gyod nga kabahin sa mga diskusyon pagsugod pang daan mao ang ikatulong component - ang Sales! Sales! Sales!
Ubos sa AGUSAN UP! ang sentrong tumong gyod sa kampanya sa ekonomikanhong pagpalambo mao ang pagpadaku sa gitawag nga income pie nga maoy mahimong tinubdan sa mahimong kita sa mga lumulupyo. Sa bahin sa Agusan del Norte nga naay gilantaw nga populasyon nga kapin kon kulang 400,000 o 80,000 ka households pag-abot sa 2027, kinahanglan makamugna kini og kapin kon kulang P30 bilyones nga income pie o ang gitawag nga provincial gross domestic product (GDP) nga maoy tinubdan sa mahimong kita sa mga lumulupyo gikan sa gibanabana nga mga kapin sa P10 bilyones lang karon.
Kining maong halin manukad gikan sa kantidad sa tanang produkto o serbisyo o halin gikan sa tanang sector sa ekonomiya (agriculture, fishery and forestry, industry and services). Gibanabana nga ang gikinahanglang halin aron makamugna sa P30 bilyones nga GDP naa sa mga P60 bilyones, ang katunga niini magsilbing kantidad sa inputs o gastu sa pagmugna sa mga produkto ug serbisyo.
Niini, gitan-aw nga ang Agusan del Norte naga-generate lang karon og sales level nga mga P20 ngadto P25 bilyones, o kulang og P40 o P35 bilyones aron maabot ang gikinahanglan nga P60 bilyones. Kini mao ang gitan-aw ni Corvera nga kinahanglang hugopan diha sa ekonomikanhong kalihukan sa mosunod nga mga tuig.
Sa bahin sa Caraga, posibleng piloon sa pito ngadto sa walo ka bahin ang gidak-on sa halin nga gikinahanglan.
Niini giaghat ni Corvera ang 190 ka participating producers ug economic services providers sa maong pag-abli sa “Buy Caraga By Caraga” nga mahimong kabahin sa kampanya pagpalapad pa sa mahimong merkado sa mga produkto sa Caraga.
Gawas sa pagdasig sa tagsa-tagsa nga mopalit gyod sa local nga produkto, nahisgutan usab ang posibleng pagpadagan og balik sa kampanya sa pagpalambo sa merkado sama sa “Caraga Goes to Manila” o sa uban pang dapit sa sulod o gawas sa nasud.
Molungtad kining maong trade fair hangtud sa Disyembre 10. (Regine Lee Gavero, Agusan del Norte 2nd Congressional District Office/PIA-Agusan del Norte)
