Residente sa Jabonga, nagsugod sa laing hugna sa TUPAD
DAKBAYAN SA BUTUAN -- Nagsugod na ang 35 ka residente sa mga barangay sa Bangonay, Cuyago ug E. Beltran sa Jabonga, Agusan del Norte sa laing hugna sa Tulong Panghanapbuhay Para sa Disadvantaged/Displaced Workers (TUPAD) sa Department of Labor and Employment (DOLE) nga gipahiluna ni Kongresista Dale B. Corvera.
Gikometer sa mga nahatagan og temporaryong trabaho ubos sa TUPAD nga makatanum sa mosuma sa 13 ektaryas tanan, walo niini, gulayan ug ang laing lima, abaca.
Ubos ning maong hugna sa TUPAD makatrabaho ang usa ka benepisyaryo sulod sa 15 ka adlaw sa sweldo nga P350 ang adlaw o P5,250 sulod sa 15 ka adlaw.
Lahi sa naandang nahimong trabaho ubos sa TUPAD nga magsilhig-silhig lang o maglimpyo lang sa lagwerta, direksyon sa TUPAD ubos sa pagpahiluna ni Kongreista Corvera mao nga makatanum ang mga benpisyaryo sunod sa gipunting sa AGUSAN UP!, ang kampanya sa pagpalambo nga hiniusang gipursige nila ni Gob. Ma. Angelica Rosedell M. Amante.
Ubos sa AGUSAN UP! gipunting ubos sa Food Secuirty Enhancement Project niini nga maka-maintain og kapin kon kulang 700 ektaryas nga regular nga gulayan aron maka-suplay og gulay nga gikinahanglan sa mga residente sa probinsya.
Gipunting usab nga makatanum ubos sa Plant! Plant! Plant! nga proyekto sa AGUSAN UP! og high value crops sa 25,000 ektaryas ug commercial trees sa 100,000 ektaryas. (Jenny D. Fabian, Agusan del Norte 2ndCongressional District Office/PIA-Agusan del Norte)
