P3M pinansyal nga tabang para CAWFAI, aprobado na
DAKBAYAN SA BUTUAN -- Pinaagi sa Sanggunian Resolution No. 621-2023, giaprobahan sa Sangguniang Panlalawigan sa Agusan del Norte ang kantidad nga P3 milyon isip pinansyal nga tabang ug suporta sa Coffee Marketing Project nga gi-plano sa Casiklan Wheels Farmers Association, Inc. kun CAWFAI human gihatagan og otoridad si Gob. Ma. Angelica Rosedell M. Amante alang sa pagpirma sa Memorandum of Agreement (MOA).
Ang nasangpit nga kantidad gamiton alang sa mga mag-uuma sa kape aron magamit sa unsa mang estratehiya o plano nila sa pagpamaligya aron kini mas molambo ug mas layo pa ang maabtan sa produkto.
Nakita usab sa komitiba sa Agriculture and Agrarian Reform sa pagpangamahan ni bokal Erwin L. Dano, ang maong proyekto nahisubay sa economic development frameworks sa agrikultura agig suporta sa pagpaningkamot sa gobyerno nga makunhuran ang kakabos sa maong komunidad.
Mahibaloan, ang CAWFAI giila tungod sa pagpaningkamot niini nga maila isip usa ka malampuson nga entrepreneur sa ingon naka mugna ug nakahatag kini og trabaho ug panginabuhian sa mga mag-uuma. (SV Deligero, PLGU Agusan del Norte/PIA-Agusan del Norte)
