Bag-ong SK president sa Agusan del Norte, milingkod na
DAKBAYAN SA BUTUAN -- Opisyal nang milingkod isip bag-ong Sanggunian Kabataan federation president sa probinsya si Gea Abby Gayle J. Rizon.
Tungod niini, gipasa sa Sangguniang Panlalawigan ang Sanggunian Resolution No. 600-2023 nga nag tudlo kang Rizon isip bag-ong chairperson sa komitiba sa Youth and Sports Development ug ang membership sa komitiba sa Disaster Risk Reduction and Management.
Sa ceremonial turnover nga gipahigayon sa maong sesyon, gipasalig sa bag-ong SK president nga iyang paningkamutan nga ang tanang mga programa ug proyekto nga nasugdan sa kanhing administrasyon iyang ipadayon ug positibong dawaton ang mga hagit nga iyang maaguman sa iyang kadumalahan.
Mahinumduman nga niadtong Nobyembre 28, pormal nga nanumpa ang mga bag-ong opisyales sa SK Federation atubangan ni Gobernador Angel Amante ug sa uban pang mga hingtungdan nga adunay kalambigitan niini didto sa VCDU Prince Hotel, Butuan City.
Gipahigayon ang maong okasyon atol sa ika-65 nga sesyon regular niadtong Disyembre 5 sa session hall, Sangguniang Panlalawigan Office sa Capitol, Butuan City. (RJSE, PLGU-Agusan del Norte/PIA-Agusan del Norte)
