Community clean-up, gipahigayon sa Las Nieves
LAS NIEVES, Agusan del Norte -- Nagpahigayon ug community clean-up ang mga barangay sa Las Nieves, Agusan del Norte kaniadtong Enero 6, 2024.
Ang municipal-wide nga pagpahina gihimo atol sa pag-arangkada sa Kalinga at Inisyatiba para sa Malinis na Bayan kon KALINISAN Sa Bagong Pilipinas, nga usa ka programa sa panggamhanan pinasikad sa Solid Waste Management Act o RA 9003.
Ang maong programa usa ka hiniusang lakang sa tanang hut-ong sa katilingban alang sa pagsulong sa usa ka limpyo, luwas, ug himsog nga Pilipinas.
Ang pag-arangkada niini gihimo atol sa pagsaulog sa annual Community Development Day 2024 nga ginapahigayon kada ika-6 sa Enero.
Isip suporta sa aktibidad, nagpagawas ug mandato si Mayor Karen Rosales sa tanang empleyado sa lokal nga panggamhanan nga mupartisipar sa pagpahina sa ilang tagsa-tagsa ka mga barangay.
"Kita sa Las Nieves kanunay gyud makigbisog kay ang kahinlo sa atong nasod dapat usa ka tinabangay nga paningkamot sa katawhan kay para man pod ni sa katawhan," pahayag ni Mayor Rosales.
Misalmot sa bayanihan si kanhing mayor ug kasamtangang Sangguniang Bayan member Avelina S. Rosales.
Misuporta usab sa kalihokan isip representante sa Department of the Interior and Local Government si Myrna B. Libao, ang municipal local government operations officer.
“Atong padayunon ang kakugi sa pagpanglimpyo sa matag panimalay,
barangay, lungsod para sa limpyo nga Pilipinas," matud pa ni Libao.
Nakig-uban ang DILG sa community clean-up drive sa Barangay Poblacion. Kauban sa DILG ang mga kapulisan gikan sa Las Nieves Municipal Police Station nga gipangulohan ni Police Captain Charlon M. Montero.
"Kami sa PNP padayon nga makigduyog ug mutambayayong sa mga kalihokan para sa kaayuhan sa lungsod ug sa atong nasud," matud ni Montero.
Mitabang usab ang mga personahe sa Bureau of Fire Protection - Las Nieves ubos sa pagdumala ni SFO4 Arniel P Goloran. Gitutukan usab ang implementasyon niini sa mga personahe sa Community Environmental and Natural Resources Office - Nasipit.
Nakita usab ang pagtinabangay sa mga katawhan sa Barangay Poblacion pinangunahan ni Punong Barangay Marck Anthony M. Japitana. Kauban ni Japitana ang mga opisyales sa Barangay lakip na ang mga Sangguniang Kabataan Officials. "Nalipay mi nga aktibo kaayo ang mga batan-on nga mipartisopar sa Clean-up drive," matud pa ni Darwin Barete, SK kagawad.
Adunay 20 ka mga barangay ang Las Nieves ug tanan kini nakiglambigit sa KALINISAN Sa Bagong Pilipinas nationwide launching activity.
Sunod nga ipahigayon ang mga monthly ug annual assessment sa pagpatuman sa KALINISAN Sa Bagong Pilipinas.
Alang sa malampusong pagpatuman sa programa, ang lokal nga panggamhanan magpadayon sa pagmintenar sa kahinlo sa lungsod subay sa mga polisiya sa panggamhanan. (MPIO, Las Nieves)
