Barangay population volunteers sa Tubay makadawat ug benipisyo
DAKBAYAN SA BUTUAN -- Nakita sa mga opisyales sa lungsod sa Tubay ang importansya sa gikuptan nga papel sa mga barangay population volunteers ((BPV) rason nga ilang giduso sa Sangguniang Panlalawigan ang Municipal Ordinance No. 2023-154 nga nagmando sa paghatag kanila og cash incentives.
Giklaro usab sa maong ordinansa ang ilang mga responsibilidad isip BPV.
Obligasyon sa mga BPV ang pag-monitor ug profiling sa matag pamilya mahitungod sa family planning, mutabang sa pagbasabot sa responsible parenthood, family planning ug uban pang responsibilidad.
Ang mga kwalipikadong makadawat mao ang mga BPV nga nag serbisyo na sa unom ka bulan pataas ug nag edad og 18 anyos pataas.
Nakalatid usab dinhi nga makadawat og P1,000 monthly cash incentives ug dugang pang P1,000 isip year-end incentive ang matag BPV sa 13 ka mga sakop nga barangay sa maong lungsod. Aduna usab silay madawat nga travelling allowance kung magpatawag og training lakip ang unipormi ug uban pang mga benipisyo.
Hugtanon kining gisuportahan sa SP pinaagi sa pagpalabang sa Sanggunian Resolution No. 639-2023 atol sa ika-66 nga sesyon regular niadtong Disyembre 12, 2023 sa pagpangamahan ni Bokal Benjamin D. Lim Jr., ang tsirman sa komitiba sa Barangay Affairs. (RJSE, PLGU-Agusan del Norte/PIA-Agusan del Norte)
