6 ka sitio sa Las Nieves, nakaangkon og kuryente ubos sa Sitio Electrification Program
LAS NIEVES, Agusan del Norte -- Puno sa kalipay nga mitambong ang mga katawhan sa tribong Higaunon sa switch-on ceremony para sa pagpasiga sa ilang mga panimalay sa Sitio Minsalaming, sakop sa interim Barangay Bokbokon ning lungsod.
Ang switch-on gipahigayon kaniadtong 12 sa Pebrero 2024.
Ang maong aktibidad gipangunahan nila ni Governor Ma. Angelica Rosedell M. Amante; Agusan del Norte 1st District Representative Jose “Joboy” S. Aquino II; National Electrification Administration (NEA) Administrator, Antonio Mariano C. Almeda; Mayor Karen S. Rosales; ug Agusan del Norte Electric Cooperative, Inc. (ANECO) General Manager, Darwin T. Daymiel.
Ang libreng pagpasiga sa kabalayan sa interim Barangay Bokbokon gipatuman subay sa Sitio Electrification Program (SEP) nga gina-implementar sa ANECO, Inc., ubos sa Rural Electrification Program sa National Electrification Administration (NEA).
Ana-a sa 230 ka panimalay sa Bokbokon ang gitinguha nga mahimong benepisyaryo sa SEP. Sa kasamtangan, mokabat sa 30 ka panimalay na ang nakaangkon ug sugang dagitab ubos sa maong programa.
Ang Sitio Minsalaming ang isa sa unom ka mga sitio sa Bokbokon nga pagata-uran ug linya sa kuryente sa ANECO, Inc. ubos sa SEP.
Mibati og dakong kalipay ang tribong komunidad sa Bokbokon sa gipatumang proyekto. Sa iyang mensahe, mipadayag si Datu Ronald L. Manhumosay sa iyang pagtimbaya ug pasalamat sa ANECO, Inc., NEA, ug sa panggamhanan sa proyektong SEP nga gipaabot sa tribong komunidad sa Bokbokon.
“Nalipay mi kay sa ka gamay sa among komunidad, gipaningkamotan gyud sa ANECO, Inc. ug sa atong panggamhanan nga maabot kami sa kuryente.” ang pahayag ni Manhumosay.
Mitambong usab sa aktibidad sila Provincial Board Member Larry F. Bautista, Vice Mayor Virgilio R. EscasiΓ±as, Jr., Punong Barangay sa Durian, Manuel A. Polongasa, ANECO, Inc. BOD President Dir. Romeo J. Gumadlas, ANECO Board of Directors, BGEN Adonis Ariel G Orio, commanding officer sa 402nd Infantry (Stingers) Brigade, PA, Lt.Col. Jeffrey P Balingao; Police Captain Charlon M Montero, ang OIC sa Las Nieves Municipal Police Station; ug uban pang opisyales sa lungsod ug sa probinsya. (MIO Las Nieves/PIA Agusan del Norte)
