Electronic medical record system gi-establisar sa Agusan Norte
DAKBAYAN SA BUTUAN -- Makita na ang medical history sa usa ka pasyente sa asa mang health facility sa probinsya sa Agusan del Norte, kini tungod sa pag-aproba sa Sangguniang Panlalawigan sa Provincial Ordinance No. 694-2024 nga nag-establisar sa Electronic Medical Record System (EMR).
Kini nga makasaysayong ordinansa nga gipangamahanan ni Bokal James T. Reserva, nagtumong nga mausa na ang medical records sa mga pasyente ning probinsya aron makatabang sa health care providers sa paghatag kanila og epektibo ug kalidad nga pag-atiman.
Pinaagi niini nga health recording system, ang healthcare data sa pasyente ibutang sa usa ka database nga ma-access sa usa ka authorized personnel sa mga ospital sa probinsya kun diin kini ibutang nga system, sama sa Agusan del Norte Provincial Hospital, Cabadbaran District Hospital, Nasipit District Hospital, Kitcharao District Hospital, Jabonga Municipal Hospital, ug Las Nieves Municipal Hospital, ug aduna usab sa rural health units ug barangay health centers sa tibook probinsya.
Ang pag-establisar sa EMR usa sa mga prayoridad sa administrasyon ni Gob. Ma. Angelica Rosedell M. Amante diin nahilakip sa Executive-Legislative Agenda (CY 2023-2025) ning probinsya. (JVD, PLGU-Agusan del Norte/PIA-Agusan del Norte)
