Pagbutang og CCTV, gimando sa Tubay
DAKBAYAN SA BUTUAN -- Giduso karon sa lungsod sa Tubay ang hugot nga pagpatuman sa pagbutang og high quality o high-end video surveillance cameras kun closed-circuit television (CCTV) o unsa mang video monitoring device sa tanang pribado o pampublikong establisamento sa nasangpit nga lungsod.
Kini gimando ubos sa Municipal Ordinance No.2023-188 alang sa pag monitor sa unsa mang mga krimen nga nahimo, trahedya ug insidente nga panghitabo aron mahatag ang bililhong tabang sa tigpatuman sa balaod sa pag-ila, pagdakop ug paggukod sa kinsa mang mga suspetsado.
Atol ni SB member Raquim D. Cuyos nga maoy nangamahanan sa maong ordinansa, gikinahanglan ang pagbutang og CCTV tungod sa nagataas nga porsyento sa krimen diin ang mga ginsad-an dili madakpan ug padayong gawasnon tungod sa walay igong ebidensya. Kini usab ipatuman isip dugang seguridad ug kalinaw sa komunidad.
Ang tanang establisamento sama sa restaurants, kompyuter shop, dry good stores, cellphone ug internet shop, gasoline station, government facilities, educational establishment o kadtong niabot sa P300,000 ang kapital obligado sa pagbutang og CCTV hilabi na ngadto sa mga high-risk areas, entrance ug exit points sa mga barangay nga rekomendado sa chief of police sa Tubay. Kadtong balay nga gustong magbutang og CCTV mahimo usab tugotan niini’ng ordinansa.
Si kinsa mang dili mo tuman sa probisyon sa maong ordinansa pagahamtangan og P1,500 sa unang opensa, P2,500 ug pag-imbargo sa business permit sa ikaduhang opensa.
Subay usab sa maong ordinansa adunay tinuig nga rehistrasyon ang maong CCTV cameras basi sa local revenue code sa lungsod sa Tubay, P300 kada tuig, P50 para sa dugang bayronon ug P100 para sa tinuig nga inspeksyon. (Reel Francisco Deligero, PLGU-Agusan del Norte/PIA-Agusan del Norte)
