Agusan Sur, nangamdam alang sa Palarong Pambansa 2026
AGUSAN DEL SUR -- Niarangkada sa pagpahayag sa bid ang probinsya sa Agusan del Sur alang sa pag-host sa Palarong Pambansa 2026.
Gipangunahan ni Governor Santiago Cane, Jr. ang delegasyon sa Agusan del Sur kauban ang mga head officials sa kapitolyo ug mga key officials sa Department of Education (DepEd) sa probinsya ug sa Caraga Region.
Mas gipakusog pa ang delegasyon sa mismong pagtambong ni 1st District Congressional Representative Alfel Bascug isip suporta sa kagustohan sa probinsya nga magmadaugon sa maong bidding.
Nahimong kaatbang sa probinsya sa Agusan del Sur ang probinsya sa Misamis Occidental ug Zamboanga City nga nakasinati na sa pag-host sa prestihiyosong kompetisyon sa isports.
Kung itugot nga magmadaugon ang probinsya, ikalipay kini sa mga AgSurnon tungod kay kini ang unang higayon nga mu-host ang probinsya sa Palarong Pambansa.
Dakong instrumento ang pagtukod sa state-of-the-art D.O. Plaza Sports Complex sa Agusan del Sur nga maoy nahimong highlight sa presentasyon.
Labaw sa tanan, gipasalig ni Gov. Cane ang 100 percent nga suporta sa tanang LGUs sa Palarong Pambansa 2026 aron sa hapsay nga pagpahigayon niini kung ihatag ang oportunidad sa Agusan del Sur. (Team Eddiebong/PIA-Agusan del Sur)
