Produktong local, prayoridad sa Agusan Norte
DAKBAYAN SA BUTUAN -- Prayoridad sa probinsyal nga panggamhanan sa Agusan del Norte ang pagpalit sa mga produkto nga hinimo sa lokal nga industriya.
Kini maoy unod sa Provincial Ordinance No. 690-2024 nga gipanginahanan ni Bokal Nieva C. Famador, nga nagtumong sa pagsuporta sa mga gagmay’ng negosyo labi na ang micro, small and medium enterprises (MSMEs) sa probinsya.
Matod pa sa maong lakang, nga adunay MSME registry diin mao kini magsilbing basihan sa probinsya sa pagpalit sa mga hinimo sa lokal.
Dugang pa, ang Provincial Economic Enterprise and Development Management Office kun PEEDMO sa pakipagtimbayayong sa Negosyo Center sa matag syudad ug munisipalidad kinahanglan magpasa sa lista sa mga eligible nga MSMEs ngadto sa Provincial Governor’s Office ug sa Sangguniang Panlalawigan aron maka-avail sa mga benepisyo sa maong ordinansa.
Aduna usab ipatuman nga mga guidelines sa maong programa, usa na niini nga 80 porsyento sa good nga gidisplay sa pasalubong centers kinahanglan hinimo sa lokal, ug ang token nga ihatag sa mga bisita sa tanan aktibidad sa kagamhanang probinsyal kinahanglan hinimo ra dinhi sa probinsya.
Ang lakang subay sa Republic Act No. 9501 o ang Magna Carta for micro, small and medium enterprises (MSMEs).
Sa pagpaningkamot ni Bokal Famador kauban ang mga myembro niini nga sila Bokal Rodulfo A. Pitogo ug Ryan Jade D. Lim ang nasangpit nga lakang naaprobahan niadtong Pebrero 27 atol sa ika-74 sesyon regular sa SP. (PLGU-Agusan del Norte/PIA-Agusan del Norte)
