Paghimo sa Mindanao Open, gi-presentar sa Agusan del Norte Chess Federation
DAKBAYAN SA BUTUAN -- Inisyal nga gihisgutan ang plano sa Agusan del Norte Provincial Chess Federation (ADNPCF) nga himoon ning tuiga ang Mindanao Chess Open gawas sa Provincial Chess Championship ubos sa ikaduhang tuig sa Chess Development Program nga hiniusang gisuportahan nila ni Kongresista Dale B. Corvera ug Gob. Ma. Angelica Rosedell M. Amante.
Himoon kining maong mga turneyo sa chess sa Hunyo 2024.
Sa usa ka meeting nga gihimo sa ADNPCF coordination center kaniadtong Abril 10, gipasabot ni Lito Gulay, presidente sa federation, nga mas moangat pa ang kalidad sa mga magdudula sa chess sa probinsya kung isulod nato sa turneyo ang kahanas sa mga magdudula sa gawas sa probinsya.
Magsilbing pagpangandam usab ang Mindanao Open sa mga players sa probinsya sa Mindanao Batang Pinoy ug Philippine National Games(PNG) qualifiers nga himoon sa Agosto ug sa Batang Pinoy ug PNG sa Disyembre.
Mahinumdoman nga nakakuha og medalyang bronze ang team sa Agusan del Norte nga miapil sa PNG sa miaging Disyembre.
Apil usab sa nahisgutan sa maong meeting mao ang kalabot sa dulang volleyball nga planong ipalambo usab sa probinsya sugod niining tuiga. (Grezel Jane L. Gulay, Agusan del Norte Congressional District Office/PIA-Agusan del Norte)
