Mga babaeng pulis mipahigayon og jail visitation
PROSPERIDAD, Agusan del Sur -- Paghatag og gugma ug kahayag sa walay kinituban pamaagi sa pagsaulog karong tuiga sa Women's Month celebration ang gitutukan sa mga kapulisang babaye sa Agusan Del Sur Police Provincial Office (ADSPPO).
Ang mga babaye nga personahe sa ADSPPO, gipanguluhan ni Police Chief Master Sergeant (PCMS) Gemma Lingatong, ubos sa pagdumala ni Police Colonel Yahya B. Yusup, officer-in-charge, kauban ang Deputy Provincial Director for Administration, Police Lieutenant Colonel Bonifacio C. Estrella Jr., Police Captain Renlyn P. Arroza, chief, women and children protection desk (WCPD), kauban usab sila Police Major Doren S. Mauricio, ug Police Lieutenant Anesita S. Caballero, nagpahigayon og jail visitation sa 15 ka babaye nga persons deprived of liberty (PDL) sa Provincial Correctional Services and Management Office (PCSMO), Patin-ay, Prosperidad, Agusan del Sur niadtong Marso 14, 2024 sa buntag.
Ang maong aktibidad gipasiugdahan sa paghatag og mensahe ni Christopher Rey L. Bardillas, acting PGDH-PCSMO, misinod ang paghatag sa hygiene kits ug food packs sa mga PDLs.
Giharanahan usab ni PCpl. Kin Mercado ug Pat. Jason Sanchez uban ni PCol. Yusop nga naghatag ug buwak ug sobre sa mga nahisgutang benepisyaryo.
"Kami nagahatag ug dakong pasalamat in behalf sa mga babaye nga PDL. Luyo sa among sitwasyon, ania kamo nga kanunay naghinumdom kanamo, bisan wala among pamilya nga makabisita kanamo, nagpasalamat me kay wala mi ninyo pasagdi," matod sa usa ka benipisyaryo.
"Isip amahan sa ADSPPO ako nagpasalamat kaninyo sa pagtugot kanamo nga mahimong bahin sa inyong kinabuhi. Hinaut nga ang among dala para kaninyo maka hatag ug kalipay, kahupayan, ug unta kini nga aktibidad inyong mahinumdoman hantod sa hantod. Happy Women's Month,” sigon ni Yusup.
Kini nga aktibidad subay sa PNP P.A.T.R.O.L Plan 2030 ubos sa community perspective Malasakit sa PNP P.A.T.R.O.L. Plan 2030 sa pag-ugmad ug mas luwas nga lugar nga puy-an, trabaho, ug negosyo sa probinsya. (ADSPPO/PIA-Agusan del Sur)
