Mga residente sa Talacogon, nakabenepisyo sa medical mission
PROSPERIDAD, Agusan del Sur - Mokabat sa 6,205 ka mga pasyente nga nag-antos sa medical, surgical, dental ug eye problems sa Agusan del Sur nakadawat ug libreng serbisyo gikan sa Foundation for Philippine Medical Missions (FPMM) sulod sa lima ka adlaw nga gipahigayon sa Talacogon District Hospital (TDH).
Uban sa 62 ka Amerikano ug Pilipino nga mga miyembro, ang FPMM team nga gilangkuban sa mga doktor, medical professionals ug non-medical workers nga nakabase sa Minnesota, USA miadto sa lungsod sa Talacogon aron lang mopahigayon sa libreng medikal nga pag-atiman sa mga AgSurnon.
Matud ni Dr. Bernard Quebral, presidente sa non-profit organization, ang mga serbisyo nga ilang gitanyag maoy katumanan sa ilang panaad nga mobalik sa Agusan del Sur human sa ilang kanhing medical mission nga gipahigayon sa lungsod sa Prosperidad sa miaging tuig.
Mahinumduman nga ang misyon sa FPMM mihimo og courtesy call kang Gob. Santiago Cane Jr. sa pag-abot niadtong Enero 22. Usa ka team gikan sa D.O. Plaza Memorial Hospital nga gipangulohan ni provincial health officer (PHO), Dr. Jacqueline Francis Momville ang nag organisa aron motabang ug mahimong kaabag sa mga sakop sa FPMM team sa pagpahigayon sa medical mission.
Matod ni Talacogon Mayor Pauline Marie Masendo ug Talacogon District Hospital chief, Dr. Rollyboy Dacera, nahimong posible ang medical mission karong tuiga tungod sa tabang nga gihatag sa Team Eddiebong, partikular na nila Kongresista Eddiebong Plaza ug Alfel Bascug, Gob. Cane, Bise Gobernador Samuel Tortor ug Patricia Plaza.
Ang mga municipal health officers sa La Paz, Dr. Hairam Encendencia ug San Luis, Dr. Alvin Jay Labella mihimo usab ug importanteng papel atol sa misyon pinaagi sa pag-ila ug pagpa-enrol sa mga pasyente nga makapahimulos sa libreng serbisyo.
Ang mga pasyente nga nag-antos sa lain-laing mga sakit nga giserbisyohan mikabat sa 2,058, samtang ang mga pasyente nga adunay problema sa ngipon nga natubag miabot sa 817. Sa mga adunay problema sa mata, 3,330 ang gihatagan nga libre nga salamin sa mata human sila gisusi. Sa mga pasyente nga naka-avail sa mga serbisyo, 18 ang nakaagi og major surgery samtang 191 ang minor operations.
Gipadayag ni Dr. Quebral ang iyang pagpasalamat ug pagpasalamat sa mga naghimo sa proyekto nga mapuslanon alang sa mga target nga mga pasyente ug ingon man sa pagkamaabiabihon ug tabang nga gihatag sa probinsyal nga panggamhanan ug sa LGU sa La Paz ug San Luis. (Kent Eldon Daligdig/PAMRE – PPIO/PIA-Agusan del Sur)
