85 anyos pataas sa Tubay, makadawat ug cash award
DAKBAYAN SA BUTUAN -- Bag-ong ordinansa ang gi-sumite karon sa lungsod sa Tubay ngadto sa probinsya sa Agusan del Norte, ang Municipal Ordinance No. 2024-195 nga nagrebisa sa Milestone Award sa mga senior citizens sa lungsod.
Ang maong ordinansa nga gipanginahanan ni SB Member Roselyn O. Simbajon, nagtinguha sa pagpalapad sa coverage sa mga benepisyaryo sa maong programa, aron masakop ang mga senior citizens nga moabot sa 85 anyos, nga kanhi 90 anyos pataas lamang ang makadawat.
Ang tanang kuwalipikadong senior citizens nga nag-edad og 85-89 anyos hatagan og usa ka higayon nga cash incentives sa kantidad nga P10,000 ug certificate of recognition, ang nag-edad usab og 90-99 anyos makadawat og P20,000 ug certificate of recognition, samatang P50,000 usab ug certificate of recognition usab ang madawatan sa senior citizens nga nag-edad og 100 anyos.
Kini nga pagrebisa gi-deklara nga balido pinaagi sa Sangguniang Panlalawigan Resolution No. 216-2024 sa pagpangamahan ni Bokal Larry F. Bautista, chairperson sa Committee on Social Welfare Population and Development kauban sila Rodulfo A. Pitogo ug Inez Rosario Amante.
Ug alang sa dugang impormasyon niini, mahimong mobisita sa MSWDO sa lungsod sa Tubay. (Reel Deligero, PLGU-Agusan del Norte/PIA-Agusan del Norte)
