Age longevity award sa Buenavista, gi-okehan sa SP
DAKBAYAN SA BUTUAN -- Aron ipatigbabaw ang mga prinsipyo sa tawhanong dignidad, sosyal nga paglakip, ug kaayohan sa komunidad, ang lungsod sa Buenavista, Agusan del Norte nagtinguha nga mahatagan ug Age Longevity Award ang mga Buenavistahanon.
Kini inisyatiba ni SB Member Eduardo P. Makiling pinaagi sa Municipal Ordinance No. 004-2024, alang niadtong naka-abot sa edad nga 85-99.
Tumong niini nga pag-ila dili lamang sa mahinungdanong kontribusyon sa mga senior citizens ngadto sa katilingban, kondili nagsiguro usab nga sila makatagamtam og mas maayong kalidad sa kinabuhi sa ilang bulawanong katuigan.
Subay sa seksyon 4 niini nga ordinansa, makadawat og Napulo ka libo ka pesos (P10,000) ang nag-edad og 90-99 years old ug Lima ka libo ka pesos (P5,000) usab sa mga nag-edad og 85-89 years old.
Ang cash award ipang-apud-apod atol sa ilang Senior Citizens Month Celebration matag bulan sa Oktubre.
Kini nga ordinansa gi-aprobahan sa Sangguniang Panlalawigan pinaagi sa Sanggunian Resolution No. 217-2024 sa pagduso ni Bokal Larry F. Bautista, chairperson sa Committee on Social Welfare, Population and Development kauban sila Rodulfo A. Pitogo ug Inez Rosario A. Amante. (Reel Deligero, PLGU-Agusan del Norte/PIA-Agusan del Norte)
