Dynamic, responsive governance, agenda sentro sa SOPA ni Gov. Amante
DAKBAYAN SA BUTUAN -- Sa State of the Province Address ni Gob. Ma. Angelica Rosedell M. Amante niadtong Hunyo 18, gisaysay ang nahimong sumbanan sa mga kalampusan sa probinsya sa miaging tuig 2023.
“In alignment with our first agenda on Dynamic and Responsive Governance, with our pursuit for a dynamic landscape of provincial growth and development – the development administration, social services, economic, infrastructure and environmental sectors serve as the pillar that shape the contours of progress and success of our implemented programs and projects,” kini ang bungad nga mensahe ni Gob. Amante atubangan sa nagkalain-laing opisyales sa munisipyo/syudad ug barangay ning probinsya lakip ang mga giimbitang lokal ug nasyonal nga mga ahensya sa gobyerno sa Capitol Covered Court, syudad sa Butuan. Kini matod pa ang nagsilbing roadmap aron makab-ot ang mga tinguha’g tumong sa dugang pang kalamboan sa kahimtang sa sa probinsya ug katawhan niini.
Sa tuig 2023, mikabat sa P286.19 milyones ang kita sa probinsya diin 19.37 pursyento nga saka sa local revenue kompara sa miaging tuig. Tungod sa revision sa valuation sa real properties sa probinsya, mikita kini og P6.39 bilyones sa maong tuig kumpara sa P3.47 bilyones sa tuig 2022. Nakadugang usab ang kita sa Provincial Economic Enterprise & Development Office nga P12.46 milyones sa maong tuig. Kini nga mga kita nakataba’g dako sa panudlanan sa panggamhanang probinsyal aron mapakgang ang dako’ng epekto sa pagkunhod sa bahin sa probinsya sa National Tax Allocation (NTA) sa miaging tuig aron ma-implementar niini ang mga programa’g proyekto nga gikinahanglan gilayon alang sa katawhan.
Sa bahin sa panarabahoan, gipasar sa Sangguniang Panlalawigan ang ordinansa nga nagmugna sa buhatan sa Provincial Employment Service Office aron matutukan ang employment generation sa probinsya ilabi na nga nagkadaghan ang nanginahanglag trabaho dili lamang sa mga bag-ong mi gradwar og kolehiyo apan lakip na kadtong mga nawad-an og panginabuhian tungod sa milabay nga pamdenya’ng COVID-19. Gani napahitabo gilayon sa PESO ang job fair sa milabay nga tuig nga naghatag oportunidad sa gatosan ka mga job seekers dili lamang sa probinsya kundi lakip taga syudad sa Butuan.
Gibida usab ni Amante ang AguSerbisyo Caravan Program diin liboan na ka
mga indibidwal sa nagkalain-laing lugar sa Agusan del Norte ilabi na mga hilit
nga lugar ang natunolan sa mga nag-unang serbisyo sa panggamhanang probinsyal.
Pinaagi sa maong programa, dili lamang pagkaon og mga tambal ang natagamtaman
sa katawhan kundi ang libreng operasyon sama sa tuli, minor surgery, ug uban
pa.
Ang ubang social services nga natunol sa probinsya sa mga Agusanon mao ang Integrated Social Development Assistance Program (ISDAP), Assistance to Individuals in Crisis Situation (AICS) ug Ayuda Para sa Kapos ang Kita (AKAP) diin ang ubang pundo naggikan sa buhatan ni Kongresista Dale B. Corvera.
Gihatagan usab og dakong pagtagad sa mga opisyales ang mga hamtong sa probinsya pinaagi sa “Pa Good Vibes ni Lolo at Lola” nga programa diin 33,000 ang nakatagamtam sa P1,000 niadtong Disyembre ug laing 4,000 kapin ang nahatagan og medikal nga atensyon. Sa maong tuig, nakadawat og P100,000 nga cash incentive ang centenarian nga taga Barangay Kinabjangan, Nasipit.
Ning tuiga sa taho sa gobernador, ubay-ubay ang mga videos nga gipresintar, kini mga testimonya niadtong mga natabangan sa probinsya nga nagpadayag sa ilang pagpasalamat kang Amante tungod sa nagkadaiyang tabang nga ilang nadawat. Matang nga naghatag inspirasyon sa mga opisyales ning probinsya nga magkugi pa aron mas moangat pa ang pagpamuyo sa mga Agusanon ilabi na niadtong mga kabos.
Sa pagkaestablisar sa AgNor Tabo, natabangan ang mga mag-uuma isip dugang pamaagi aron mabaligya ang ilang mga abot sa pagpanguma. Pinaagi sa maong programa, natapok ang 17 ka national line agencies, farmer coops ug associations, civil society organizations ug 10 private companies nga matod pa naka-generate og kita nga P1.104 milyones sa 4 ka adlaw lang nga pagpamaligya sa publiko.
Sa matang sa turismo, aduna nay gi-offer karon ang probinsya nga Tour Agnor packages sa mga turista aron ilang masinati ang kaanyag sa probinsya pinaagi sa tourist attractions nga siguradong mag-enjoy ang mobisita niini. Kini maghatag og dugang kita sa panudlanan sa LGU kung asa kini makaplagan ug usab oportunidad nga panginabuhian sa mga residente.
Matod sa gobernador, gitutukan usab sa probinsya ng infrastructure development sa tibook probinsya nga gigastohan og P1.5 bilyones nga naglangkob sa lainglaing infra projects sama sa tulay, mga gambalay, eskwelahan, water systems, pagpaayo sa mga health institutions, ug uban pa.
Sa iyang mensahe, gipasalamatan sa gobernador ang tanang mga ahensya sa gobyerno nga mitabang sa probinsya sa miaging tuig aron makab-ot ang tanang mga kalamposan sa tuig 2023.
“The calendar 2023 was indeed a success, that made me and my fellow Agusanons feel so grateful with each and everyone’s contributions,” matod pa niya.
“Thank you for your commitment and dedication to build a prosperous, sustainable, and resilient Agusan del Norte. The journey ahead requires our collective efforts, and I am confident that with your support, we will achieve our goals and pave the way for progress that the future remembers,” dugang pa ni Amante sa iyang panapos nga mensahe. (PLGU-Agusan del Norte/PIA-Agusan del Norte)
